Select Page

ᐊᕐᓇᐃᑦ ᐃᓄᐃᑦ ᐃᖅᑲᓇᐃᔭᖅᑐᑦ ᐱᕙᓪᓕᐊᔪᓕᕆᕝᕕᖕᓂ ᑮᓇᐅᔭᓕᐅᕐᓂᒃᑯᑦ ᓈᒻᒪᙱᑦᑐᓕᐅᕐᕕᖃᖅᑐᑦ ᑮᓇᐅᔭᓕᐅᖅᑎᓪᓗᐊᑕᐅᕙᒃᖢᑎᒃ ᐃᓄᒋᐊᓄᑦ ᐃᒡᓗᖃᑎᒌᓄ ᐃᓄᐃᑦ ᓄᓇᖓᓂ

ᐋᑐᕚ, ᒫᔅᓯ 31, 2021 – ᐅᓪᓗᒥ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᓴᖅᑭᑎᑦᑎᖕᒪᑕ ᖃᐅᔨᓴᕈᑎᒋᓯᒪᔭᖏᓐᓂᒃ ᒪᑯᓂᖓ ᐃᓄᐃᑦ ᐊᕐᓇᐃᑦ ᑮᓇᐅᔭᓕᐅᕐᓂᕆᕙᒃᑕᖏᓐᓂᒃ ᐊᒻᒪ ᐱᕙᓪᓕᐊᒍᑎᖏᓐᓂᒃ ᐊᒻᒪᓗ ᐊᕐᓇᐅᓂᕐᒧᑦ ᐸᒡᕕᓵᕆᔭᐅᕙᖕᓂᕐᒥᒃ ᐃᖅᑲᓇᐃᔭᖅᓂᖏᓐᓂᒃ ᐊᑐᒃᑲᓐᓂᕈᓐᓇᖅᑐᓕᕆᓂᖅᒧᑦ ᓄᓇᓕᕆᓂᕐᒥᒃ ᐱᓕᕆᕝᕕᐅᔪᓂᒃ.

ᖃᐅᔨᓴᕈᑎᐅᔪᖅ ᖃᐅᔨᒍᑎᐅᓚᐅᕐᑐᖅ ᐃᓄᐃᑦ ᐊᕐᓇᐃᑦ ᓇᑉᐸᖓᑕ ᐅᖓᑖᓃᑦᑐᑦ ᖃᐅᔨᓴᖅᑕᐅᔪᕕᓃᑦ ᐊᑐᖅᓯᒪᓂᖏᓐᓂᒃ ᐊᕐᓇᐅᓂᕐᒧᑦ ᐸᒡᕕᓵᕆᔭᐅᖃᑦᑕᕐᓂᕐᒥᒃ ᐊᒻᒪ ᐋᓐᓂᖅᓱᖅᑕᐅᕙᖕᓂᕐᒥᒃ ᐃᖅᑲᓇᐃᔭᖅᓂᖏᓐᓂᒃ ᖃᖓᑐᖄᓗᖕᓂ ᐊᖑᑎᓄᑦ ᐱᓕᕆᐊᖑᖃᑦᑕᕐᓯᒪᔪᒥ ᐅᔭᕋᒃᓯᐅᕐᕕᓕᕆᓂᕐᒥᒃ. ᐊᑐᖅᑕᐅᒐᔪᓛᖑᔪᓪᓕ ᖃᓄᐃᓕᐅᖅᑕᐅᒍᑏᑦ ᒪᑯᐊ ᐊᕐᓇᐅᓂᕐᒧᑦ ᐅᖃᕐᕕᐅᓂᖅ, ᐃᒡᓚᕐᓇᖅᑐᒃᑯᑦ ᐅᖃᐅᓯᑎᒍᑦ, ᐊᑐᖅᑕᐅᑲᑕᒐᓱᖕᓂᖅ ᐊᑐᖅᑕᐅᔪᒪᑎᓐᓇᒋᑦ ᐊᒻᒪᓗ ᐃᓱᒪᒃᑯᑦ ᐋᓐᓂᕈᑎᐅᔭᑦᑐᓄᑦ.

ᖃᐅᔨᓴᕐᓂᕐᒧᑦ ᖃᐅᔨᒍᑎᐅᓚᐅᕐᒥᔪᖅ ᐃᒪᓐᓇ ᐃᓄᐃᑦ ᐊᕐᓇᐃᑦ ᐃᓄᒋᐊᓂᒃ ᐃᒡᓗᖃᑎᖏᓐᓂᒃ ᑮᓇᐅᔭᓕᐅᖅᑎᐅᕙᖕᓂᖏᓐᓂᒃ ᐃᓄᐃᑦ ᓄᓇᖓᓂᒃ ᑮᓇᐅᔭᓕᐊᖏᑦ ᒥᑭᑦᑐᕈᓘᑎᓪᓗᒋᑦ ᐅᑯᓇᓂ ᐊᑐᒃᑲᓐᓂᕈᓐᓇᖅᑐᓕᕆᓂᖅᒧᑦ ᓄᓇᓕᕆᓂᕐᒥᒃ ᐱᓕᕆᕝᕕᐅᔪᓂᒃ. ᑖᓐᓇ ᖃᐅᔨᓴᕈᑎᐅᔪᖅ ᓇᓗᓇᐃᖅᓯᓪᓚᕆᙱᒃᑲᓗᐊᖅᑎᓪᓗᒋᑦ ᐊᕐᓇᐃᑦ ᐃᓄᐃᑦ ᐃᖅᑲᓇᐃᔮᕆᕙᒃᑕᖏᓐᓂᒃ, ᓴᖅᑭᑦᑎᒍᑎᐅᓚᐅᕐᑐᖅ ᐃᒪᓐᓇ ᑖᒃᑯᐊ ᐊᕐᓇᐃᑦ ᐃᓚᖏᓐᓂᒃ ᐃᑲᔪᖃᑦᑕᕐᓂᖏᓐᓂᒃ ᑮᓇᐅᔭᓕᐊᖏᓐᓄᑦ ᐊᑦᑎᖕᓂᖅᓴᓪᓛᓗᖕᒥ ᐅᑯᓇᙵᑦ ᑕᒪᐃᓐᓂ ᐃᓄᖕᓂ ᐃᓅᙱᑦᑐᓄᓪᓗ ᐊᖑᑎᓄᑦ ᑮᓇᐅᔭᓕᐊᕆᔭᐅᕙᒃᑐᓂᒃ, ᐊᒻᒪᓗ ᐃᓅᙱᑦᑐᓂᒃ ᐊᕐᓇᓂᒃ.

“ᐅᓇ ᖃᐅᔨᓴᕈᑎᐅᔪᖅ ᓇᓗᓇᐃᕐᓯᓯᒪᓪᓚᕆᒃᑐᖅ ᐱᑕᖃᕆᐊᖅᑲᓪᓚᕆᖕᓂᖓᓂᒃ ᐱᐅᓯᕚᓪᓕᖅᑎᑦᑎᒍᑎᓂᒃ ᐅᑯᐊ ᐊᕐᓇᐃᑦ ᐃᓄᐃᑦ ᐅᓗᕆᐊᓇᙱᑦᑐᒃᑯ ᐃᓚᐅᑎᑕᐅᖃᑦᑕᕆᐊᖃᕐᓂᖏᓐᓂᒃ ᐊᒻᒪ ᖁᕕᐊᓇᕐᑐᒃᑯᑦ ᐱᑖᕈᑎᖃᖅᑎᑕᐅᔭᕆᐊᖃᕐᓂᖏᓐᓂᒃ ᒪᐅᓇ ᐊᑐᒃᑲᓐᓂᕈᓐᓇᖅᑐᓕᕆᓂᖅᒧᑦ ᓄᓇᓕᕆᓂᕐᒥᒃ ᐱᓕᕆᕝᕕᐅᔪᓂᒃ ᐅᑭᐅᕐᑕᖅᑐᕐᒥ,” ᕇᐱᑲ ᑲᑦᓗ, ᐊᖓᔪᖅᑳᖅ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, ᑖᒃᑯᐊᓗ ᐱᓕᕆᐊᖃᖅᑎᑦᑎᓚᐅᕐᓯᒪᔪᑦ ᖃᐅᔨᓴᕈᑎᓂᒃ ᐃᑲᔫᑎᖃᖅᑎᑕᐅᓪᓗᑎᒃ ᐅᑯᓇᙵᑦ ᐊᕐᓇᓂᒃ ᐊᒻᒪ ᖃᓄᐃᑦᑑᓂᕐᒧᑦ ᐊᔾᔨᒌᒃᑎᑦᑎᓂᖅ (WAGE) ᑲᓇᑕᒥ.

ᐅᓇ ᐅᓂᒃᑳᖅ, ᐅᖃᐅᓯᖃᕐᓂᖅ ᐃᓄᐃᑦ ᐊᕐᓇᐃᑦ ᑮᓇᐅᔭᓕᐅᕈᓐᓇᕐᓂᖏᓐᓄᑦ ᐊᒻᒪ ᐱᕙᓪᓕᐊᔪᓐᓇᕐᓂᖏᑦ ᐊᑐᒃᑲᓐᓂᕈᓐᓇᖅᑐᓕᕆᓂᖅᒧᑦ ᓄᓇᓕᕆᓂᕐᒥᒃ ᐱᓕᕆᕝᕕᐅᔪᓂᒃ (Addressing Inuit Women’s Economic Security and Prosperity in the Resource Extraction Industry), ᓇᓗᓇᐃᕐᓯᓯᒪᔪᖅ ᐊᑯᑦᑐᓂᐅᔪᓂᒃ ᐊᒻᒪ ᐃᖅᑲᓇᐃᔮᖑᔪᓐᓇᖅᑐᓂᒃ ᐃᓄᖕᓄᑦ ᐊᕐᓇᓄᑦ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ, ᐊᒻᒪᓗ ᓴᖅᑭᑎᑦᑎᓯᒪᓪᓗᓂᓗ ᐊᑐᖅᑕᐅᖃᑦᑕᖅᑐᓂᒃ ᐃᖅᑲᓇᐃᔭᖅᕕᖕᒥᑦ ᐊᕐᓇᐅᓂᕐᒧᑦ ᐋᓐᓂᖅᓱᖅᑕᐅᕙᖕᓂᕐᒥᒃ ᐊᒻᒪ ᐸᒡᕕᓵᕆᔭᐅᖃᑦᑕᖅᑐᓂᒃ ᐊᕐᓇᓂ ᐃᖅᑲᓇᐃᔭᖅᑎᓂᒃ.

ᐅᓇ ᖃᐅᔨᓴᕈᑎ ᓇᓗᓇᐃᕐᓯᓯᒪᔪᖅ ᐃᒪᓐᓇ ᐃᓄᐃᑦ ᐊᕐᓇᐃᑦ ᐅᓗᕆᐊᓇᙱᑦᑐᒦᑉᐸᒃᑲᓗᐊᖅᖢᑎᒃ ᐃᖅᑲᓇᐃᔭᕆᐊᕐᕕᐅᕙᒃᑐᓂᒃ, ᐅᓄᖅᑐᑦ ᓱᓕ ᐊᕐᓇᐅᓂᕐᒧᑦ ᐸᒡᕕᓵᕆᔭᐅᖃᑦᑕᖅᑐᑦ ᐊᒻᒪ ᐋᓐᓂᖅᓱᖅᑕᐅᓕᖅᐸᒃᖢᑎᒃ ᐱᓕᕆᐊᖏᓐᓂᒃ ᐱᓕᕆᐊᖃᕋᓗᐊᖅᑎᓪᓗᒋᑦ.

ᖃᓄᐃᑦᑑᓂᕐᒧᑦ ᐃᖅᑲᓇᐃᔮᒥᑦ ᐊᑐᖅᑕᐅᕙᒃᑐᑦ ᐊᑐᒃᑲᓐᓂᕈᓐᓇᖅᑐᓕᕆᓂᖅᒧᑦ ᓄᓇᓕᕆᓂᕐᒥᒃ ᐱᓕᕆᕝᕕᐅᔪᓂᒃ ᓱᓕ ᐃᖅᑲᓇᐃᔭᖅᑎᑦᑎᕙᒃᑐᑦ ᐊᕐᓇᓂᒃ – ᐱᓗᐊᖅᑐᒥᒃ ᐃᓄᖕᓂ ᐊᕐᓇᓂᒃ – ᐃᖅᑲᓇᐃᔮᒃᓴᓂᒃ ᒪᑯᓇᓂ ᐃᖅᑲᓇᐃᔮᒃᓴᓕᕆᓂᕐᒧᑦ, ᓴᓗᒻᒪᖅᓴᐃᔨᐅᓂᒃᑯᑦ ᐊᒻᒪ ᓂᕿᓕᕆᓂᕐᒧᑦ ᐱᓕᕆᐊᒃᓴᓂᒃ. ᐃᖅᑲᓇᐃᔮᖑᕙᑦᑐᑦ ᐊᒃᑐᐊᔪᑦ ᒪᑯᓂᖓ ᐃᒡᓗᒥ ᓴᓗᒻᒪᕐᓴᐃᔨᐅᓂᕐᒧᑦ ᐊᒻᒪ ᓂᕿᓕᕆᕝᕕᖕᒥᑦ ᐱᓕᕆᐊᒃᓴᐃᑦ ᐊᕐᓇᓂ ᐅᓗᕆᐊᓇᖅᑐᒦᑎᑦᑎᓂᖅᓴᐅᕙᖕᒪᑕ ᐋᓐᓂᕐᓱᐃᕆᓂᒃᑯᑦ ᐊᒻᒪ ᐸᒡᕕᓵᕆᔭᐅᓂᕐᒧᑦ ᐃᖅᑲᓇᐃᔭᖅᑎᓪᓗᒋᑦ ᒪᑯᓇᓂ ᑭᓇᑐᐃᓐᓇᕐᒧᑦ ᐅᐸᒃᑕᐅᔭᕆᐊᖃᙱᑦᑐᓂᒃ ᓴᓇᔭᖅᑐᕐᕕᒃᒥᑦ, ᓲᕐᓗ ᒪᑯᓇᓂ ᐃᒡᓗᕈᓯᕐᓂᒃ ᐊᒻᒪ ᐊᕐᓇᕐᕕᖕᓂᒃ.

ᐊᒻᒪᓗ, ᖃᐅᔨᓴᕐᓂᐅᔪᖅ ᓴᖅᑭᑎᑦᑎᓚᐅᕆᓪᓗᓂ ᖃᓄᐃᓕᐅᕈᑎᕕᓂᕐᓂᒃ ᐃᖅᑲᓇᐃᔭᖅᕕᖕᒥᑦ ᐊᕐᓇᐅᓂᕐᒧᑦ ᐸᒡᕕᓵᕆᔭᐅᖃᑦᑕᖅᑐᑦ ᐊᒻᒪ ᐋᓐᓂᕐᓱᐃᕆᔪᕕᓂᕐᓂᒃ ᐅᖃᐅᓯᖃᖃᑦᑕᙱᓗᐊᕐᓂᖏᓐᓂᒃ ᐃᓄᐃᑦ ᐊᕐᓇᐃᑦ ᐃᖅᑲᓇᐃᔮᖏᓐᓂᒃ ᐊᓯᐅᔨᓂᐊᕋᓱᒋᓪᓗᑎᒃ, ᑲᙳᓱᖕᓂᕐᒧᑦ, ᐃᓱᒫᓗᖕᓂᕐᒧᓪᓗ ᐅᕝᕙᓘᓐᓃᑦ ᑕᒪᑐᒧᖓ ᐱᓕᕆᐊᖑᐃᓐᓇᕋᔭᕆᐊᒃᓴᖏᓐᓂᒃ.

ᐃᓚᒋᔭᐅᓪᓗᓂ ᖃᐅᔨᓴᕐᓂᕐᒧᑦ, ᐃᓚᒋᔭᐅᔪᑦ ᐊᐱᕆᔭᐅᓚᐅᕐᓯᒪᔪᑦ ᖃᓄᖅ ᐱᓕᕆᐊᖃᕈᑎᒃ ᑕᒪᑐᒥᖓ ᐱᐅᓯᕚᓪᓕᖅᑎᑦᑎᓇᔭᕐᒪᖔᑕ ᐃᓄᐃᑦ ᐊᕐᓇᐃᑦ ᐊᑐᖅᐸᒃᑕᖏᓐᓂᒃ. ᐱᓂᖅᐹᖑᔪᕐᓕ ᐃᓱᒪᓕᐊᕆᔭᖏᓐᓂᒃ ᐱᑕᖃᕆᐊᖃᕐᓂᖓᓂᒃ ᐊᕐᓇᐅᓂᕐᒧᑦ ᐸᒡᕕᓵᕆᓂᕐᒧᑦ ᐊᑐᐊᒐᕐᓂ ᐋᖅᑭᒃᓱᐃᓗᑎᒃ ᐱᓕᕆᖃᑎᖃᕐᓗᑎᒃ ᐃᓄᖕᓂ ᐊᕐᓇᓂᒃ ᓱᖅᑯᐃᓇᑦᑎᐊᕈᓐᓇᕐᓂᐊᕐᒪᑕ, ᓇᓗᓇᙱᑦᑎᐊᕐᓗᑎᒃ, ᐊᑐᐃᓐᓇᐅᔪᓐᓇᕐᓗᑎᒃ ᐊᒻᒪ ᐱᔭᕆᐊᖃᖅᑕᖏᓐᓄᑦ ᑐᕌᖓᓗᑎᒃ.

ᐊᒻᒪᒃᑲᓐᓂᖅ, ᑖᒃᑯᐊ ᐅᓂᒃᑳᑦ ᐱᖅᑯᔨᓯᒪᔪᑦ ᐃᓕᖅᑯᓯᕐᒧᑦ ᓈᒻᒪᓈᕋᓱᒃᑐᓂᒃ ᐃᖅᑲᓇᐃᔭᖅᕕᖕᒥᑦ ᐊᔪᕈᓐᓃᖅᓴᖅᑎᑦᑎᓂᕐᒥᒃ ᐊᑐᐊᒐᓂᒃ ᐊᒻᒪ ᐊᑐᖅᑕᐅᔭᕆᐊᖃᖅᑐᓂᒃ – ᓄᓇᓖᑦ ᐃᓄᒃᑐᑦ ᐅᖃᐅᓯᕆᕙᒃᑕᖓᒍᑦ – ᐃᓄᐃᑦ ᐊᕐᓇᐃᑦ ᖃᐅᔨᒪᓂᐊᕐᒪᑕ ᐊᒻᒪ ᑐᑭᓯᓯᒪᓗᑎᒃ ᐱᔪᓐᓇᐅᑎᖏᓐᓂᒃ ᐃᖅᑲᓇᐃᔭᖅᕕᐅᔪᓂᒃ.

ᐸᐅᒃᑑᑎᒃᑯᑦ ᐅᖃᒃᑲᓐᓂᕐᓯᒪᔪᑦ ᖃᐅᔨᔭᐅᔪᓄᑦ ᐅᓂᒃᑳᓂ ᐅᑯᐊ ᐃᓄᐃᑦ ᐊᕐᓇᐃ ᑕᑯᔪᒪᓂᖏᓐᓂᒃ ᓄᓇᓕᕆᓂᕐᒥᒃ ᐱᓕᕆᐊᖃᖅᑐᑦ ᐃᓱᒪᓕᐅᕆᖃᑦᑕᖁᔭᐅᓪᓗᑎᒃ ᐸᒡᕕᓵᕆᔭᐅᖃᑦᑕᖅᑐᑦ ᓈᒻᒪᙱᓐᓂᖓᓄᑦ ᐱᓕᕆᐊᕆᔭᐅᕙᒡᓗᑎᒃ, ᐊᒻᒪ ᐃᑲᔪᕈᑎᒃᓴᖃᒃᑲᓐᓂᕐᓗᑎᒃ ᑭᓲᓂᕐᒧᑦ ᑐᕌᖓᔪᓂᒃ ᐃᑲᔪᕈᑎᒃᓴᓂᒃ ᐊᕐᓇᓄᑦ ᐃᖅᑲᓇᐃᔭᖅᑐᓄᑦ, ᒪᑯᑎᑐᓇᖅ ᓴᓇᕝᕕᖕᒥᑦ ᐸᐃᕆᕝᕕᒃᑕᖃᓕᕐᓗᓂᓘᓐᓃᑦ ᐊᒻᒪ ᐃᓅᓯᓕᕆᓂᕐᒧᑦ ᐱᔨᑦᑎᕋᐅᑎᑕᖃᕐᓗᓂ.

ᐅᓇ ᖃᐅᔨᓴᕈᑎᒧᑦ ᖃᐅᔨᒍᑎᐅᔪᖅ ᐱᐅᓂᕐᐹᒃᑯᑦ ᐊᒻᒪ ᐱᓕᕆᐊᖃᐅᕈᓘᔭᕐᓂᒃᑯᑦ ᖃᐅᔨᓴᕈᑎᓄᑦ ᑎᑎᕋᖅᑕᐅᓯᒪᔪᓂᒃ, ᐱᐊᓂᒃᑕᐅᓚᐅᕐᓯᒪᔪᖅ ᐅᑯᓄᖓ 29-ᓄᑦ ᐃᓄᐃᑦ ᐊᕐᓇᓄᑦ ᐅᑯᓇᙶᖅᑐᓂᒃ ᐊᕐᕕᐊᑦ (ᓄᓇᕗᑦ), ᓴᓪᓗᐃᑦ (ᓄᓇᕕᒃ), ᐃᓅᕕᒃ (ᐃᓄᕕᐊᓗᐃᑦ) ᐊᒻᒪ ᖃᒪᓂᑦᑐᐊᕐᒥᑦ (ᑭᕙᓪᓕᖅ). ᑕᒪᕐᒥᒃ ᐱᓕᕆᖃᑕᐅᔪᑦ ᒫᓐᓇ ᐃᖅᑲᓇᐃᔭᖅᑎᐅᔪᑦ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᐅᓚᐅᕐᓯᒪᔪᑦ ᓄᓇᓕᕆᓂᒃᑯᑦ ᐊᑐᒃᑲᓐᓂᕈᓐᓇᖅᑐᓕᕆᓂᖅᒧᑦ ᓄᓇᓕᕆᓂᕐᒥᒃ ᐱᓕᕆᕝᕕᐅᔪᓂᒃ ᐅᑭᐅᕐᑕᖅᑐᕐᒥᑦ.

ᐃᑲᔪᕈᑎᖃᖅᑎᑕᐅᓯᒪᔪᑦ ᖃᐅᔨᓴᕐᓂᕐᒧᑦ ᐅᑯᓇᙵᑦ ᐊᕐᓇᓂᒃ ᐊᒻᒪ ᖃᓄᐃᑦᑑᓂᕐᒧᑦ ᐊᔾᔨᒌᒃᑎᑦᑎᓂᖅ (WAGE) ᑲᓇᑕᒥ, ᐃᓚᖃᖅᖢᓂ ᐃᑲᔫᑎᓂᒃ ᐅᑯᓇᙵᑦ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ. ᐅᓂᒃᑳᓕᐊᖑᓂᑯᓂᒃ ᐱᔪᒪᒍᕕᑦ, ᐅᓇ ᑕᑯᒋᐊᕐᓗᒍ.

-30-

ᖃᐅᔨᒃᑲᓐᓂᕈᒪᒍᕕᑦ, ᐅᓇ ᐅᖃᕐᕕᒋᓗᒍ: ᓲᓴᓐ ᑭᖕ, (613) 724-1518, sking@pauktuutit.ca

Share This