Select Page

ᐸᐅᒃᑑᑎᒃᑯᑦ ᐃᖅᑲᐅᒪᔭᐅᑎᒃᓯᕗᑦ ᐃᓅᓯᕆᓚᐅᕐᑕᖏᓐᓂᒃ ᐊᒻᒪ ᐳᐃᒍᕐᑕᐅᑦᑕᐃᒋᐊᖃᓐᓂᖏᓐᓂᒃ  ᑭᖑᕐᑕᐅᓯᒪᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ ᐃᓄᐃᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᐊᒻᒪ ᐊᕐᓇᐅᔭᕐᓂᒃ ᐊᖑᑎᐅᔭᕐᓂᒃ ᐊᒻᒪ ᐊᓯᖏᓐᓂᒃ, ᑖᒃᑯᐊ ᐃᖅᑲᐅᒪᔭᐅᑦᔪᑎᒃᓴᖏᓐᓂᒃ ᐱᓕᕆᐊᖃᕐᑎᒃᓯᓂᐊᕐᐳᑦ. 

ᐃᑲᔪᕐᑐᕐᑕᐅᑦᓱᑕ ᖃᓄᕐᑑᕐᑎᓂᒃ ᑲᑎᒻᒪᔨᓂᒃ, ᐊᓚᒃᑲᐅᒪᑎᒃᓯᒋᐊᕐᓂᐊᕐᑐᒍ ᐊᒻᒪ ᖃᐅᔨᒪᔭᐅᓂᕐᓴᐅᖁᓪᓗᒋᑦ ᑭᖑᕐᑕᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᐃᓄᐃᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᐊᒻᒪ ᐊᕐᓇᐅᔭᕐᓂᒃ ᐊᖑᑎᐅᔭᕐᓂᒃ ᐊᒻᒪ ᐊᓯᖏᓐᓂᒃ ᑲᓇᑕᒥ.

ᑕᒪᓐᓇ ᐃᖃᐅᒪᓂᕐᒧᑦ ᐱᓕᕆᐊᖅ ᐃᓄᐃᑦ ᐊᕐᓇᐃᑦ ᐅᖃᖅᓯᒪᕗᑦ ᐃᓱᒪᒋᔭᒥᓐᓂᒃ ᐊᒻᒪ ᓂᕆᐅᒋᔭᒥᓐᓂᒃ ᐃᖅᑲᐅᒪᒋᑦᓱᒋᑦ ᐃᓚᒋᔪᓐᓂᕐᑕᕗᑦ ᓇᓪᓕᒋᔭᕗᑦ, ᑖᒃᑯᐊ ᐃᖅᑲᐅᒪᔭᐅᑦᓯᐊᖁᓪᓗᒋᑦ, ᑕᐃᒫᒃ ᐃᓄᐃᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᐊᓐᓂᕐᑎᕐᑕᐅᕙᓐᓂᖏᑦ ᓄᖅᑲᖁᓪᓗᒍ.

“ᐊᐅᐸᕐᑐᖅ ᐊᒪᐅᑎ” ᐃᖅᑲᐅᒪᔭᐅᑦᔪᑎᒋᔭᐅᓲᖑᓕᕐᒪᑦ ᐊᒥᓲᓗᐊᓕᕐᑐᓄᑦ ᐊᕐᓇᓄᑦ ᐊᒻᒪ ᓱᕈᓯᕐᓄᑦ ᐃᓚᒋᐅᔪᓐᓂᕐᓯᒪᔪᓄᑦ.

ᖃᐅᔨᒪᔭᐅᓂᕐᓴᐅᖁᓪᓗᒋᑦ ᐊᒻᒪ ᐅᑦᔨᕆᔭᐅᓂᕐᓴᐅᖁᓪᓗᒋᑦ, ᐱᓇᓱᐊᕐᑎᒃᓯᓂᐊᕐᑐᒍᑦ ᐃᓄᐃᑦ ᐊᕐᓇᖏᓐᓂᒃ ᑎᓴᒪᓂᒃ ᐊᒪᐅᑎᓕᐅᕐᑎᒃᓯᓗᑕ  ᓇᓗᓇᖏᑦᑐᓂᒃ ᓄᓇᖃᕐᕕᖏᓐᓂᖓᕐᑐᓂᒃ.  ᐊᒪᐅᑏᑦ ᐱᑕᖃᐅᓂᐊᕐᑐᑦ ᓱᓇᓂᒃ ᐱᓯᒪᔪᓂᒃ ᐊᑐᓂᑦ ᓄᓇᓕᕆᓂᕐᒧᑦ ᐊᕕᒃᑐᕐᓯᒪᐅᕐᕕᖏᓐᓂ, ᐊᒪᐅᓯᐅᕐᑕᐅᓯᒪᔪᓂᒃ ᐃᓄᐃᑦ ᒥᕐᓱᕐᑎᖏᓐᓄᑦ, ᐃᖅᑲᐅᒪᔭᐅᖁᓪᓗᒋᑦ ᐃᓚᒋᔪᓐᓂᕐᑕᕗᑦ. ᐃᓱᒪᒐᓗᐊᕐᑐᒍᑦ ᑖᒃᑯᐊ ᐊᑦᔨᐅᖏᑦᑐᑦ ᑎᓴᒪᐃᑦ ᐊᒪᐅᑏᑦ ᐃᓕᖅᑯᓯᓕᕆᓂᕐᒧᑦ ᐅᐸᒐᐅᔪᓂᓗᑎᒃ ᐃᓄᐃᑦ ᓄᓇᖓᑦᓂ ᐊᒻᒪ ᑲᓇᑕᒥ.  

ᒫᓐᓇᒃᑯᑦ ᑐᒃᓯᕋᕋᓗᐊᕐᐳᒍᑦ ᐱᓕᕆᑦᔪᑎᐅᒐᓱᐊᕈᒪᔪᓂᒃ ᐃᓄᐃᑦ ᒥᕐᓱᑎᖏᓐᓂᑦ ᐊᒪᐅᓯᐅᕈᒪᔪᓂᒃ ᐃᖅᑲᐅᒪᑦᔪᑎᐅᓗᑎᒃ ᐃᓄᐃᑦ ᐊᕐᓇᖏᓐᓂᒃ ᐊᒻᒪ ᓂᕕᐊᕐᓯᐊᓂᒃ ᑭᖑᕐᑕᐅᓯᒪᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ. 

ᑐᓂᓯᔪᒪᒍᕕᑦ ᐱᓕᕆᑦᔪᑎᒋᒐᓱᐊᕈᒪᔭᓐᓂᐅᕕᑦ ᐱᔭᕆᕆᐊᓕᒃ ᑕᑕᑎᕆᐊᓕᒃ ᐊᒻᒪ ᑐᓂᓗᒍ ᐃᓱᒪᒋᔭᐅᖁᓪᓗᒍ ᐅᕗᖓ gdesmarais@pauktuutit.ca

ᒪᑐᓛᕐᑐᖅ: ᓯᑎᐱᕆ 10, 2021

###