Select Page

ᐊᑐᕙ, ᓯᑎᐱᕆ 17ᒥ, 2021 – ᔭᒐᐅᖅᑲᔪᓄᑦ ᐊᒻᒪ ᑐᖁᑕᐅᓯᒪᔪᓄᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᐊᒻᒪ ᓂᕕᐊᕐᓯᐊᑦ ᐱᑦᔪᑎᒋᑦᓗᒋ ᐸᐅᒃᑑᑎᒃᑯᑦ ᖃᓄᕐᑑᓂᒃᒧᑦ ᑲᑎᒻᒪᔨᕋᓛᖏᑦ ᖃᕆᓴᐅᔭᒃᑯᑦ ᑲᑎᒻᒪᓚᐅᕐᑐᑦ ᓯᑎᐱᕆ 16ᒥ, 2021, ᕿᒥᕐᕈᒃᓱᑎᒃ ᑐᓂᔭᐅᓯᒪᔪᓂᒃ ᐱᓇᓱᐊᕈᑎᐅᔪᒪᔪᓂᒃ ᐃᓄᐃᑦ ᒥᕐᓱᑎᖏᓐᓄᑦ ᐃᓄᐃᑦ ᓄᓇᖓᓂᕐᒥᐅᓄᑦ ᐊᐅᐸᕐᑐᓂᒃ ᐊᒪᐅᓯᐅᕈᒪᔪᓄᑦ, ᑲᑎᒻᒪᔨᕋᓛᑦ ᓇᓗᓇᐃᕐᓯᓚᐅᕐᑐᑦ ᑎᓴᒪᓂᒃ ᒥᕐᓱᕐᑎᓂᒃ ᐆᑦᑐᓂᐊᕐᑐᓂᒃ ᐊᒻᒪ ᒥᕐᓱᕐᓂᐊᕐᑐᓂᒃ ᑎᓴᒪᓂᒃ ᐊᒪᐅᑎᓂᒃ ᓇᓗᓇᕐᓂᐊᕋᑎᓪᓗᒍ ᓇᓪᓕᐊᓃᖔᕐᒪᖔᑕ ᑖᒃᑯᓇᖓᑦ ᑎᓴᒪᐅᔪᓂᒃ ᐊᕕᒃᑐᕐᓯᒪᐅᕐᕕᒃᓂ.  ᑖᒃᑯᓄᖓ ᑎᓴᒪᐅᔪᓄᑦ ᐃᓚᒋᔭᐅᓂᐊᕐᒥᔪᑦ ᐊᓯᖏᑦ ᒥᕐᓱᕐᑎᐅᔪᑦ ᒥᕐᓱᓂᐊᕐᑐᑦ ᐅᑦᔨᕐᓱᕈᑎᐅᓂᐊᕐᑐᒥᒃ ᐅᐱᒍᓲᑎᒋᓗᒋᑦ ᐃᓄᑐᖃᕗᑦ ᐊᒻᒪ ᖃᐅᔨᒪᔭᑐᖃᕐᓂᒃ ᐃᓕᓐᓂᐊᕐᑎᒃᓯᑦᔪᑕᐅᕙᓐᓂᖏᓐᓂᒃ.  

ᐸᐅᒃᑑᑎᒃᑯᑦ 11ᓂᒃ ᑐᓂᔭᐅᓚᐅᕐᑐᑦ ᐱᓇᓱᐊᕈᒪᑦᔪᑎᐅᔪᓂᒃ, ᑕᓪᓕᒪᓂᒃ ᓄᓇᕘᒦᖔᕐᑐᓂᒃ ᐊᒻᒪ ᒪᕐᕈᐃᓂᒃ ᐊᑐᓂᒃ ᓄᓇᕕᒃᒥᑦ, ᓄᓇᑦᓯᐊᕘᒥᑦ ᐊᒻᒪ ᐃᓄᕕᐊᓗᒃᓂᑦ.

ᓂᕈᐊᕐᑕᐅᓚᐅᕐᑐᑦ ᒥᕐᓱᕐᑎᐅᓂᐊᕐᑐᑦ ᐅᑯᐊ:

  • ᔫᓇᐃᓯ ᑑᖔᓗᒃ ᐃᒃᐱᐊᕐᔪᒃᒥᐅᖅ, ᓄᓇᕘᒥᑦ
  • ᓯᐊᕋ ᓵᒥᓴ ᐃᓄᒃᔪᐊᕐᒥᐅᖅ, ᓄᓇᕕᒃᒥ
  • ᕼᐊᑐ ᐊᖕᓇᑐᒃ ᓇᐃᓂᒥᐅᖅ, ᓄᓇᑦᓯᐊᕘᒥᑦ
  • ᓲᓂ ᐃᓚᐃᐊᔅ ᐃᓅᕕᒃᒥᐅᖅ, ᐃᓄᕕᐊᓗᒃᒥᐅᓂ
  • ᐃᓕᓴᕐᓯᑦᔪᑎᐅᔪᓂᒃ: ᓈᓯ ᐳᒃᑮᓐᓈᖅ ᐊᐅᐸᓗᒃᑐᖅ ᖃᒪᓂᕐᑐᐊᕐᒥᐅᖅ, ᓄᓇᕘᒥ

ᖃᓄᕐᑑᓂᒃᒧᑦ ᑲᑎᒻᒪᔨᕋᓛᑦ ᓇᓗᓇᐃᕐᓯᓚᐅᕐᑐᑦ ᐊᑐᕐᓱᑎᒃ ᓈᓴᐅᑎᑎᒍᑦ, ᐊᑐᓂᑦ ᐱᓇᓱᐊᕈᑎᐅᔪᒪᔪᑦ ᓈᓴᐅᑎᑖᕐᑎᑕᐅᕙᒃᓱᑎᒃ ᒪᓕᒃᓱᒋ ᖃᐅᔨᒪᓂᖏᑦ, ᐊᑭᓪᓗᐊᑕᕆᓂᐊᕐᑕᖏᑦ, ᖃᐅᔨᒪᔮᒥᓐᓂᒃ ᖃᐅᔨᒃᑲᐃᑎᒃᓯᔪᑎᒋᓂᐊᕐᑕᖏᑦ ᐊᒻᒪ ᖃᓄᖅ ᐃᓱᒪᓴᕐᓯᐅᕐᓯᒪᓂᖏᑦ.

ᔭᒐᐅᖃᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᐃᓄᐃᑦ ᐊᕐᓇᐃᑦ ᐃᖅᑲᐅᒪᔭᐅᑦᔪᑎᖃᓐᓂᐊᕐᒪᑕ, ᑕᒪᑐᒨᓇ ᐊᐅᐸᕐᑐᓂᒃ ᐊᒪᐅᓯᐅᕐᓂᒃᑯᑦ. ᑕᒪᑐᒨᓇ ᐅᑦᔨᕆᔭᐅᓂᕐᓴᐅᖁᓪᓗᒋᑦ ᐃᖅᑲᐅᒪᕙᕈᑦ ᓇᓪᓕᒋᓚᐅᕐᑕᕗᑦ ᐊᒻᒪ ᑭᒃᑯᓕᒫᓂᒃ ᑎᓕᐅᕆᑦᓱᑕ ᓄᖅᑲᑎᒃᓯᕚᓪᓕᖅᑯᓪᓗᒋᑦ ᐊᓐᓂᑎᕐᑕᐅᓂᕆᕙᒃᑕᖏᑦ ᐃᓄᐃᑦ ᐊᕐᓇᐃᑦ, ᓂᕕᐊᕐᓯᐊᑦ ᐊᒻᒪ ᐊᓯᖏᑦ.

ᕆᐱᑲ ᑲᓪᓗᒃ ᐅᖃᓚᐅᕐᑐᖅ ᐃᒫᒃ: “ᓇᑯᕐᒦᒃᑕᕗᑦ ᐃᓗᓐᓇᑎᒃ ᒥᕐᓱᕐᑎᐅᔪᑦ ᑐᓂᓯᓚᐅᕐᑐᑦ ᐱᓇᓱᕈᑎᒋᔪᒪᔭᒥᓐᓂᒃ ᐊᒻᒪ ᐊᒪᐅᓯᐅᓂᕐᒧᑦ ᐃᓱᒪᑦᓴᕐᓯᐅᕈᑎᒋᓯᒪᔭᒥᓐᓂᒃ.  ᐊᒥᓱᐃᑦ ᐃᓄᐃᑦ ᐊᕐᓇᐃᑦ ᑐᑯᑦᖁᑦᔨᓚᐅᕐᒪᑕ ᐱᐅᔪᒻᒪᕆᐅᔪᓂᒃ.  ᓇᑯᕐᒦᕈᒪᒻᒥᔭᒃᑲ ᖃᓄᕐᑑᓂᕐᒧᑦ ᑲᑎᒻᒪᔨᕌᓛᑦ ᐱᓇᓱᐊᕐᓂᕆᓚᐅᕐᑕᖏᓐᓄᑦ ᐊᒻᒪ ᐃᓱᒪᑦᓴᕐᓯᐅᕈᑎᖃᑦᓯᐊᕐᓯᒪᓚᐅᕐᒪᑕ ᓇᓗᓇᐃᕐᑕᐅᔪᓂᒃ ᒥᕐᓱᕐᑎᐅᓂᐊᕐᑐᓂᒃ.  ᐊᒪᐅᓯᐅᕐᓂᖅ ᑕᑯᑦᓴᐅᑎᒃᓯᑐᐃᓐᓇᐅᖏᓐᒪᑦ ᐃᓄᐃᑦ ᐊᕐᓇᐃᑦ ᐱᔪᓐᓇᕐᓂᖏᓐᓂᒃ ᑭᓯᐊᓂᑦᑕᐅᖅ ᐃᖅᑲᐅᒪᑦᓯᑦᔪᑎᐅᒻᒪᑦ ᔭᒐᐅᖅᑲᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ. ”

ᐃᓱᒪᒐᓗᐊᕐᑐᒍᑦ ᑕᒪᒃᑯᐊ ᐊᑦᔨᐅᓗᐊᖏᑦᑐᑦ ᐊᒪᐅᑏᑦ ᐃᓕᖅᑯᓯᑐᖃᓕᕆᓂᕐᒧᑦ ᑕᑯᔭᒐᖃᕐᕕᒃᒦᖁᓪᓗᒋᑦ ᐃᓄᐃᑦ ᓄᓇᖓᑦᓂ ᐊᒻᒪ ᑲᓇᑕᒥ.  ᐱᔭᕇᕐᑕᐅᓯᒪᓕᖅᑲᑕ ᓇᓗᓇᐃᕐᓯᓛᕐᑐᒍ ᓇᒥ ᐊᒪᐅᑏᑦ ᑕᑯᑦᓴᐅᑎᑕᐅᓛᕐᒪᖔᑕ.

ᐸᐅᒃᑑᑎᒃᑯᑦ ᐅᖃᖃᑎᖃᕐᓯᒪᓕᕐᑐᑦ ᐊᒪᐅᓯᐅᕐᓂᐊᕐᑐᓂᒃ ᖃᓄᐃᓕᖓᓂᐊᕐᒪᖔᑦ ᐊᒪᐅᓯᐅᕐᓂᐅᔪᖅ.  ᐃᓕᓴᕆᔪᒪᒻᒥᔭᕗᑦ ᐃᓗᓐᓇᑎᒃ ᒥᒃᓱᕐᑎᐅᔪᑦ ᑐᓂᓯᓚᐅᕐᑐᑦ ᐱᓇᓲᑎᒋᔪᒪᔭᒥᓐᓂᒃ ᐊᒻᒪ ᐱᓇᓱᐊᖃᑕᐅᔪᒪᓚᐅᕐᓂᖏᑦ.

ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑎᒥᐅᕗᑦ ᑭᒡᒐᕐᑐᐃᑦᓱᑎᒃ ᐃᓄᐃᑦ ᐊᕐᓇᖏᓐᓂᒃ ᑲᓇᑕᒥ.

-30-

ᑐᑭᓯᒋᐊᒃᑲᓐᓂᕕᒃᓴᖅ ᐅᓇ:

ᑳᑎ ᐅᐃᑦᑕᑯ Cathie Whittaker: 613-238-3977 Ext 271 / cwhittaker@pauktuutit.ca