Select Page

 ᐅᖃᒪᐅᑎᖃᓚᐅᕐᑐᑦ ᐳᕿᕐᑎᓕᒃᑯᑦ ᐱᐅᓯᕆᕙᒃᑕᖏᓐᓂᒃ ᐃᓄᐃᑦ ᓄᓇᖏᓐᓂ ᐊᒻᒪ ᐱᓕᕆᐊᑦᓴᐃᓐᓇᒥᒃᓂᒃ ᐃᓄᐃᑦ ᐊᓐᓇᐃᑦ ᐊᒻᒪ ᓱᕈᓰᑦ ᐊᑦᑕᓇᑦᑕᐃᓕᒪᒋᐊᖃᓐᓂᖏᓂᒃ 

ᐋᑐᕚ, ᔪᓚᐃ 14, 2020 – ᐅᓪᓗᒥ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᖃᐅᔨᑲᐃᔪᒪᔪᑦ ᐸᐅᒃᑑᑎᒃᑯᑦ ᐊᖏᔪᖅᑳᖓᑦ ᕆᐱᑲ ᑯᓪᓗ ᐊᒻᒪ ᐳᑭᕐᑎᓕᒃᑯᑦ ᐊᖏᔪᖅᑳᒪᕆᖓᑦ ᑲᑎᒻᒪᖃᑎᒌᑦᓯᐊᔪᒻᒪᑕ ᑕᓪᓕᒥᕐᒥ ᐅᖃᓕᒪᐅᑎᖃᕐᓱᑎᒃ ᐳᑭᕐᑎᓕᒃᑯᑦ ᐱᐅᓯᕆᕙᒃᑕᖏᓐᓂᒃ ᐃᓄᐃᑦ ᐊᕐᓇᖏᓐᓄᑦ ᐊᑦᑐᐊᓂᖃᕐᑐᓂᒃ ᐊᒻᒪ ᐊᓚᒃᑲᐃᑐᐃᓐᓇᕆᐊᖃᓐᓂᕐᒥᑦ ᐸᐅᒃᑑᑎᒃᑯᑦ ᐊᒻᒪ ᐳᕿᑦᑎᓕᒃᑯᑦ ᓴᖅᑮᑐᐃᓐᓇᕆᐊᖃᓐᓂᖏᓐᓂᒃ ᓯᕗᒧᐊᒃᔪᑎᒃᓴᒥᒃ. ᐅᖄᓚᐅᑎᒃᑯᑦ ᑲᑎᒻᒪᖃᑕᐅᓚᕐᒥᔪᖅ Brian Brennan ᐳᑭᒃᑎᓕᒃᑯᑦ ᐊᖏᔪᖅᑳᒪᕆᖓᑦᑕ ᑐᖏᓕᖓ ᐱᓕᕆᓪᓗᐊᑕᕐᑐᖅ ᑲᓐᑐᕋᓕᕆᓂᕐᒧᑦ ᐊᒻᒪ ᓄᓇᖃᖅᑳᕐᓯᒪᔪᓄᑦ ᐳᑭᕐᑎᓕᐅᓂᕐᒥᓐᓂᒃ. 

ᑖᓐᓇ ᐊᕐᕌᒍ ᐱᒋᐊᓕᕋᑖᕐᑎᓪᓗᒍ, ᐸᐅᒃᑑᑎᒃᑯᑦ ᐊᓚᒃᑲᐃᔪᒻᒪᑕ ᐅᓂᒃᑳᓕᐊᕆᓯᒪᔪᓂᒃ, ᐃᓱᒫᓗᑦᔪᑕᐅᓂᖏᑦ ᐊᕐᓇᐃᑦ ᐊᓐᓂᑎᕐᑕᐅᕙᓂᖏᑦ: ᖃᐅᔨᓴᕐᑕᐅᓪᓗᓂ ᐳᑭᕐᑎᓕᒃᑯᑦ ᐊᑐᐊᒐᖏᑦ ᐊᒻᒪ ᐱᐅᓯᕆᕙᒃᑕᖏᑦ ᐃᓄᐃᑦ ᓄᓇᖓᓐᓂ , ᐊᓯᑦᔩᕐᑕᐅᖁᓪᓗᒍ ᐅᑭᐅᕐᑕᕐᑐᒥ ᐸᓖᓯᐅᕙᓐᓂᖏᑦ ᖃᓄᕐᑑᕐᑕᐅᒋᐊᑲᓐᓂᖁᓪᓗᒍ ᐃᓄᐃᑦ ᐊᕐᓇᐃᑦ ᐊᓂᕐᑎᑕᐅᓗᐊᕐᑐᐊᓗᕚᓐᓂᖏᑦ. 

ᐅᓂᒃᑳᓕᐊᖑᓯᒪᔪᓂ ᓇᓗᓇᐃᕐᑕᐅᓗᐊᓚᐅᕐᑐᑦ 15 ᖑᔪᑦ ᐊᑐᓕᕐᑕᐅᖁᔭᐅᔫᒐᓗᐊᑦ ᐸᓖᓯᒃᑯᑦ ᐊᓯᑦᔨᕐᕚᓪᓕᖁᓪᓗᒋᑦ ᓄᓇᓕᖕᒥᐅᓄᑦ ᐃᓚᐅᑎᓗᐊᖏᓐᓂᖏᑦ ᓄᓇᓕᖕᓂᓕ ᑕᐱᕆᔭᐅᓂᕐᓴᐅᖁᓪᒋ ᐅᑯᐊ ᐃᓱᒪᒋᑦᓱᒋ: 

 ᐊᑐᓕᕐᑕᐅᓗᓂ ᐸᓖᓯᐅᖁᓪᓗᒋᑦ ᐃᓄᐃᑦ ᐃᓕᖅᑯᓯᖏᑎᒎᖓᔫᒥᔪᓂᑦ ᐊᒻᒪ ᖁᐊᕐᓴᕐᓯᒪᔪᓂᒃ ᐅᑦᔨᕐᓱᓂᕐᒥᑦ; 

 ᓴᖅᑭᕐᑕᐅᖁᓪᓗᒋᑦ ᐃᓄᐃᑦ ᐅᑲᐅᑦᔨᒋᐊᕐᑏᑦ ᑲᑎᒻᒪᔨᕋᓛᑦ; 

 ᐸᓖᓯᑯᑦ ᐊᑐᐊᒐᖏᓐᓂ ᓴᖅᑮᔪᖃᓪᓗᓂ ᐊᕐᓇᓄᑦ ᑐᕌᖓᓗᐊᖑᐊᕐᑐᓂᒃ ᐊᒻᒪ ᐸᓕᓰᒃᑯᑦ ᐃᓕᓐᓂᐊᕐᑎᑕᐅᖃᑦᑕᕐᓗᑎᒃ ᐊᕐᓇᐃᑦ ᐊᓐᓂᑎᕐᑕᐅᕙᓂᖏᑦ ᐱᑦᔪᑎᒋᓪᓗᒋᑦ; ᐊᒻᒪᓗ ᐊᕐᓇᒥᒃ ᐸᓖᓯᑕᖃᖁᓪᓗᒍ ᐊᕐᓇᐃᑦ ᐊᓐᓂᑎᕐᑕᕕᓂᐅᑎᓪᓗᒋᑦ ᐊᐱᕐᓱᕐᑕᐅᔪᖃᕐᑎᓪᓗᒍ; ᐊᒻᒪ 

 ᐊᑐᖃᑦᑕᓕᕐᓗᑎᒡᓗ ᖃᓪᓗᓈᑦ ᓲᖑᓵᖏᓪᓗᑎᒃ ᓯᕗᒧᐊᖃᑦᑕᕐᓗᑎᒃ ᐊᑐᕐᓗᑎᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐊᒻᒪ ᓯᓚᕐᔪᐊᕐᒥᐅᓄᑦ ᐃᓱᒪᒋᔭᐅᕙᒃᑐᓂᒃ. 

ᕆᐱᑲ ᑯᓪᓗ ᐅᖃᓚᐅᕐᑐᖅ “ᐳᕿᑦᑎᓕᒃᑯᑦ ᐊᖏᔪᖅᑳᒪᕆᖓᑦ Lucki ᐅᖃᓕᒪᖃᑎᒋᓚᐅᕐᑐᒍ ᑲᑦᓱᖓᐃᕐᓯᒪᓂᕐᓴᐅᓕᕆᕗᒍᑦ ᑐᑭᓯᐅᒪᑦᓯᐊᑐᕐᔫᔮᕐᒪᑦ ᐸᐅᒃᑑᑎᒃᑯᑦ ᐸᓕᓯᓕᕆᓂᕐᒧᑦ ᐊᑐᓕᕐᑕᐅᖁᔭᖏᓐᓂᒃ ᐊᒻᒪ ᐃᓗᖏᕐᓱᕐᑐᕐᔫᔮᕐᒪᑦ ᑕᒪᑦᓱᒥᖓ ᓯᕗᒧᐊᒃᑎᒃᓯᓂᕐᒥᑦ”. “ ᖁᕕᐊᒃᐳᒍᑦ ᐋᔨᖃᑎᖃᕈᒪᓂᖓᓂᒃ ᓴᕿᔪᖃᖁᓪᓗᒍ ᐸᐅᒃᑑᑎᒃᑯᑦ ᐊᒻᒪ ᐳᑭᕐᑎᓕᒃᑯᑦ ᓯᕗᒧᐊᒃᔪᑎᒋᔪᓐᓇᕐᑕᖓᓂᒃ ᐊᖏᖃᑎᒋᑦᔪᑎᒥᒃ.” 

“ᑐᓴᐅᒪᖃᑎᒋᑦᓯᐊᓂᖅ ᐊᑑᑎᖃᓐᓂᕐᐹᖑᒻᒪᑦ ᐱᓕᕆᖃᑎᒋᑦᓯᐊᕐᑐᖃᕐᑎᓪᓗᒍ.” “ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑕᓪᓕᒥᕐᒥ ᐅᖄᓚᐅᑎᒃᑯᑦ ᑲᑎᒻᒪᖃᑎᒋᑦᓱᒋᑦ ᓇᓗᓇᐃᕐᓯᕗᖅ ᑲᑐᑦᔨᖃᑎᒌᓐᓂᖅ ᐊᒻᒪ ᐋᔩᖃᑎᒌᓐᓂᖅ ᓯᕗᒧᐊᒃᑎᒃᓯᔪᓐᓇᕐᒪᑦ ᑕᒪᒃᑮᓐᓄᑦ ᐅᕙᒃᑎᓐᓄᑦ ᐱᓇᓱᐊᒐᒃᑎᓐᓂᒃ ᐊᒻᒪ ᑲᒪᒋᔪᒪᔭᒃᑎᓐᓂᒃ. ᐳᑭᕐᑎᓕᒃᑯᑦ ᐊᒻᒪ ᐸᐅᒃᑑᑎᑯᑦ ᑕᒪᒃᑮᒃ ᑕᑯᔪᒪᖕᒪᑕ ᐃᓄᐃᑦ ᐊᒥᓲᓂᕐᓴᐃᑦ ᐹᓕᓯᕈᖁᓪᓗᒋᑦ ᐊᒻᒪ ᐃᖅᑲᓇᐃᔭᕐᑎᐅᓗᑎᒡᓗ ᐊᒻᒪ ᐊᑑᑎᖃᕐᑎᒃᓯᓚᕆᒐᓱᐊᕐᓂᕐᒥᒃ ᐱᒻᒪᕆᐅᔪᓂᒃ ᐃᓕᖅᑯᓯᑐᖃᕐᑎᒍᑦ ᑐᑭᓯᐅᒪᓂᕐᒥᑦ ᐃᓕᓐᓂᐊᕐᑎᒃᓯᔪᑎᓂᒃ ᑕᒪᓐᓇ ᐃᓕᓐᓂᐊᕐᑕᐅᖏᓐᓇᕆᐊᖃᓕᕐᓗᓂᓗ ᐳᑭᕐᑎᓕᒫᓄᑦ ᐱᓕᕆᕙᒃᑐᓂ ᐃᓄᐃᑦ ᓄᓇᖓᑦᓂ.” 

ᐳᑭᕐᑎᓕᒃᑯᑦ ᐊᖏᔪᖅᑳᒪᕆᖓᑦ Lucki ᐅᖃᐅᓯᖃᓪᓗᐊᓚᐅᕐᑐᖅ ᐃᑲᔪᕐᑐᐃᓂᕐᒥᓂᒃ ᐃᓄᖕᓄᑦ ᑐᕋᖓᓪᓗᐊᖑᐊᑕᕐᑐᓂᒃ 2019ᒥ ᑭᓪᓕᓯᓂᐊᕐᑐᖃᓚᐅᕐᑎᓪᓗᒍ ᔭᒐᐃᔭᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᑦ ᐊᕐᓇᐃ ᐊᒻᒪ ᓂᕕᐊᕐᓯᐊᑦ ᐅᓂᒃᑳᓕᐊᖑᓯᒪᔪᓂ ᑎᑎᖅᑲᓂ, ᐊᒻᒪ ᐱᒻᒪᕆᐅᓂᖓᓂᒃ ᓄᓇᓕᖕᒥᐅᑦ ᐃᑲᔪᓯᒪᔭᐅᒋᐊᖃᓐᓂᖏᓐᓂᒃ ᓱᕐᓗ ᐱᕕᖃᕐᑎᑕᐅᓗᑎᒃ ᕿᒫᕕᒃᓴᖃᓪᓗᑎᒃ ᐊᒻᒪ ᐃᓱᒪᓕᕆᓂᕐᒧᑦ ᐱᓕᕆᔪᖃᕐᓗᓂᓗ. ᐅᖃᐅᓯᖃᓚᐅᕐᒥᔪᖅ ᐳᑭᕐᑎᓕᒃᑯᑦ ᒪᓐᓇᑯᑦ ᐱᓕᕆᐊᖏᓐᓂᒃ ᐸᓕᓯᑖᕋᓱᐊᕐᓂᕐᒧᑦ ᐊᒻᒪ ᐃᓕᓐᓂᐊᕐᑎᒃᓯᓂᕐᒥᑦ ᐊᒥᓲᓂᕐᓴᐅᔪᓂᒃ ᐃᓄᖕᓂᒃ ᐸᓕᓯᕈᕈᓐᓇᖁᓪᓗᒋᑦ. 

ᕆᐱᑲ ᑯᓪᓗ ᐅᖃᓚᐅᕐᑐᖅ “ᐳᑭᕐᑎᓕᒃᑯᑦ ᐊᖏᔪᖅᑳᒪᕆᖓᑦ Lucki ᑲᑎᒻᒪᖃᑎᒋᓚᐅᕐᓱᒍ ᐃᓱᒪᓕᕐᐳᖓ ᐃᓱᒪᖃᑎᒌᐳᒍᒃ ᐃᓄᐃᑦ ᐊᕐᓇᐃᑦ ᐊᒻᒪ ᓱᕈᓰᑦ ᐊᑦᑕᓇᕐᑐᒦᖃᑦᑕᖁᓇᒋᑦ ᐊᒻᒪ ᑲᒪᒋᔭᐅᑦᓯᐊᕐᓗᑎᒡᓗ. ᐋᔨᖃᑎᒌᖃᑦᑕᕈᒪᓕᕐᐳᒍᒃ ᐊᒻᒪ ᐱᓕᕆᖃᑎᒋᑦᓯᐊᕈᒪᕙᕋ ᐃᖅᑲᓇᐃᕐᑕᐅᖁᓪᓗᒋᑦ ᑕᒪᒃᑯᐊ ᐊᓯᑦᔩᕙᓕᐊᑦᔪᑎᒃᓴᐃᑦ ᐃᓄᐃᑦ ᐊᕐᓇᐃᑦ ᐊᒻᒪ ᓱᕈᓰᑦ ᐊᑦᑕᓇᕐᑐᒦᖃᑦᑕᖁᓇᒋᑦ ᐊᒻᒪ ᒪᓕᒐᕐᑎᒍᑦ ᐋᖅᑮᕚᓕᐊᐸᓪᓕᐊᓂᕐᒧᑦ. ᑕᒪᓐᓇ ᓯᕗᒧᐊᑦᓯᐊᕐᔪᑎᐅᒻᒪᑦ ᓴᐃᓕᖃᑎᒋᓐᓂᕐᒧᑦ. 

ᐳᑭᕐᑎᓕᒃᑯᑦ ᐊᖏᔪᖅᑳᒪᕆᖓᑦ Lucki ᐅᖃᓚᐅᕐᑐᖅ ᐳᑭᕐᑎᓕᒃᑯᑦ ᐱᓇᓱᐊᖃᑎᖃᑦᓯᐊᕈᒪᕗᑦ ᐸᐅᒃᑑᑎᑦᑯᓐᓂᑦ ᐊᒻᒪ ᑲᓇᑕᓕᒫᒥᑦᑐᓂᒃ ᐊᒻᒪ ᐊᕕᒃᑐᕐᓯᒪᐅᑐᓂᒃᑐᓂᒃ ᓄᓇᖃᖅᑳᕐᓯᒪᔪᓂᒃ ᐊᒻᒪ ᓄᓇᖕᒥᐅᑕᐅᔪᓂᒃ ᑲᓇᑕᒥ ᐱᕚᓕᑎᒃᓯᓂᕐᒧᑦ ᐊᒻᒪ ᐊᓯᑦᔨᕙᓪᓕᐊᓂᕐᒧᑦ ᐊᒻᒪ ᐳᑭᕐᑎᓕᒃᓯᐊᕙᐅᓇᓱᓐᓂᕐᒧᑦ ᑲᓇᑕᒥᐅᑕᑦ ᑕᐃᒫᒃ ᓂᕆᐅᓐᓂᖃᒻᒪᑕ ᐅᕙᒃᑎᓐᓂᒃ. 

ᐸᐅᒃᑑᑎᑦ ᐃᓱᒪᒐᓗᐊᕆᕗᑦ ᐱᓇᓱᐊᖃᑎᖃᕈᒪᓪᓗᑎᒃ ᐊᕕᒃᑐᕐᓯᒪᐅᕐᑐᓂ ᒐᕙᒪᐅᔪᓂᒃ ᐸᓕᓯᓕᕆᔨᐅᔪᓂᒃ ᐃᓄᐃ ᓄᓇᖓᓐᓂ. ᒪᓐᓇᑯᑦᓕ ᐸᐅᒃᑑᑎᒃᑯᑦ ᐋᔩᖃᑎᖃᕐᐸᓪᓕᐊᕗᑦ ᓄᓇᕘᑉ ᒐᕙᒪᒃᑯᖏᓐᓂᒃ ᐃᓄᐃᑦ ᐊᕐᓇᐃᑦ ᐊᑐᕐᓯᒪᔭᖏᑦ ᐊᒻᒪ ᐊᑐᓕᕐᑎᑕᐅᖁᓯᒪᔭᖏᑦ ᑭᓪᓕᒋᔭᐅᖃᑦᑕᕐᓗᒋᑦ ᐸᓃᓯᓕᕆᓂᕐᒧᑦ ᐊᑐᐊᒐᓕᐅᕐᑐᖃᕐᑎᓪᓗᒍ ᐃᓄᐃᑦ ᐊᕐᓇᐃᑦ ᐊᒻᒪ ᓱᕈᓰᑦ ᐊᑦᑕᓇᕐᑕᐃᓕᒪᒋᐊᖃᓐᓂᖏᑦ ᐱᕙᓪᓕᖁᓪᓗᒋ. 

-30- 

ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑲᓇᑕᓕᒫᒧᑦ ᑎᒥᐅᔪᑦ ᑭᒡᒐᕐᑐᐃᑦᓱᑎᒃ ᐃᓗᓐᓇᓕᒫᖏᓐᓂᒃ ᐃᓄᐃ ᐊᕐᓇᖏᓐᓂᒃ ᑲᓇᑕᒥ. ᐱᑦᔪᑎᖃᕐᑐᑦ ᐅᑦᔨᕆᔭᐅᓂᕐᓴᐅᖁᓕᖁᓪᓗᖏᑦ ᐃᓄᐃᑦ ᐊᕐᓇᐃᑦ ᑭᓐᖑᒪᔭᖏᑦ ᐊᒻᒪ ᐊᕐᓇᐃᑦ ᐃᓚᐅᓂᕐᓴᐅᖁᓪᓗᒋᑦ ᓄᓇᓕᖕᓂ, ᐊᕕᒃᑐᕐᓯᒪᐅᕐᑐᓂᓗ ᐊᒻᒪ ᑲᓇᑕᓕᒫᓂ ᐱᑦᔪᑎᒋᓪᓗᒋᑦ ᑐᕌᖓᔪᑦ ᐃᓅᓯᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ ᐊᒻᒪ ᑭᓇᐅᔭᑯᑦ ᐱᕙᓪᓕᕐᓯᒪᖁᓪᓗᒋᑦ. 

ᑐᑭᓯᒋᐊᑲᓐᓂᕐᕕᒃᓴᖅ ᐅᖃᕐᕕᒋᓗᒍ

Catherine Fortin LeFaivre 
613-979-8683 
cfl@impactcanada.com 

Share This