English version available here. French version available here.
ᐊᖓᔪᖅᑳᖅ ᐅᑯᓄᖓ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ (PIWC), ᕇᐱᑲ ᑲᓪᓗ, ᐅᓪᓗᒥ ᐅᖃᐅᓯᒃᓴᖃᕐᒪᑦ ᐆᒧᖓ ᓄᓇᕗᒥᑦ ᐃᖅᑲᖅᑐᐃᕕᒡᔪᐊᒃᑯᑦ ᐃᓱᒪᓕᐊᖓᓂᒃ ᐸᓯᔭᒃᓴᐅᔪᓐᓃᖅᑎᑦᑎᓂᖏᓐᓂᒃ ᓵᓐᑐᕋ ᐊᒥᕋᓕᒃ ᑐᖁᑎᑦᑎᓂᖓᓂᒃ ᐱᔮᕆᓂᕐᒨᙱᑦᑐᖅ ᐊᐃᑉᐸᖓᓂᒃ ᕼᐊᐅᐃ ᐋᓗᒃᒥ.
“ᖃᓄᐃᒍᑏᑦ ᐊᒻᒪ ᖃᓄᐃᓕᐅᕈᑎᐅᔪᑦ ᐅᑯᓄᖓ ᓄᓇᕗᒥᑦ ᐃᖅᑲᖅᑐᐃᕕᒃᒥᑦ ᐃᓱᒪᓕᐅᕆᔾᔪᑎᒋᔭᐅᓕᕐᓯᒪᔪᑦ ᐅᓇ ᐸᓯᔭᒃᓴᐅᑎᑕᐅᓯᒪᔪᖅ ᑐᖁᑎᑦᑎᓂᕐᒥᒃ ᐱᔮᕆᓂᕐᒨᙱᑦᑐᖅ ᐆᒥᖓ ᐊᐃᑉᐸᖓᓂ ᖁᕕᐊᓇᙱᑦᑐᐊᓗᒃ ᐃᓅᔪᓐᓃᕐᑐᒧᑐᐊᖑᙱᑦᑐᖅ ᑭᓯᐊᓂᓕ ᐊᐃᐸᕆᓚᐅᕐᑕᖓᓄᑦ ᐊᒻᒪᓗ 6-ᓄ ᕿᑐᕐᖓᖏᓐᓄᑦ, ᐅᖅᓱᖅᑑᕐᒥᐅᓄᑦ ᐊᒻᒪᓗ ᑕᒪᐃᓐᓄᑦ ᓄᓇᓕᖕᓄᑦ.
“ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ (PIWC) ᖁᕕᐊᓱᒃᑐᑦ ᑖᒃᑯᐊ ᑲᑐᔾᔨᖃᑎᒌᑦ ᐱᓕᕆᐊᖓᒍᑦ ᐃᓚᒌᓂᒃ ᐱᑦᑎᐊᖃᑦᑕᖏᓗᐊᕐᓂᐊᓗᖕᒥ ᐃᑲᔫᑎᖃᕈᓐᓇᓚᐅᕐᒪᑦ ᐃᖅᑲᖅᑐᐃᔨᒥᒃ.
“ᓄᓇᕗᒥᑦ ᐅᓄᓗᐊᕐᑐᐊᓘᓂᖏᑦ ᐊᐃᑉᐸᕇᖑᔪᑦ ᐱᑦᑎᐊᖃᑦᑕᐅᑎᙱᓗᐊᖃᑦᑕᖕᓂᖏ ᐱᔾᔪᑎᖃᓗᐊᕐᒥᖕᒪᑦ ᐊᓯᐊᓂᒃ ᐃᓅᓯᖃᓕᖅᑎᑕᐅᓯᒪᓂᕐᒧᑦ, ᐊᓯᐊᓂᒃ ᓄᓇᑖᖅᑎᑕᐅᓯᒪᓂᕐᒧᑦ ᐊᒻᒪᓗ ᐃᓕᓐᓂᐊᕆᐊᖅᑎᑕᐅᕙᓚᐅᕐᑐᑦ ᐊᒃᑐᖅᑕᐅᓯᒪᓂᖏᓐᓄᑦ.
“ᐅᓪᓗᒥᓕ, ᒪᑯᐊ ᓯᕗᓂᖏᓐᓂᒃ ᐋᓐᓂᕈᑎᐅᓗᐊᕐᓯᒪᓂᑯᑦ ᐃᓄᖕᓂ ᐱᕈᖅᐸᓪᓕᐊᓗᐊᖃᑦᑕᕐᒪᑕ ᓇᓗᓇᓗᐊᓕᕐᖢᑎᒃ ᐊᒻᒪᓗ ᐋᓐᓂᕈᑎᐅᓕᔭᖢᑎᒃ, ᐃᓚᖃᖅᖢᑎᒃ ᐃᒥᐊᓗᒃᒥᑦ ᐊᒻᒪ ᐊᓯᖏᓐᓂᒃ ᐋᖓᔮᕐᓇᖅᑐᓂᒃ, ᐊᒻᒪᓗ ᐋᓐᓂᕐᓯᕆᕙᖕᓂᕐᒥᒃ ᐃᓚᒌᑎᒍᑦ.
“ᐊᒻᒪᒃᑲᓐᓂᖅ, ᐃᒡᓗᐃᑦ ᐃᓄᒋᐊᓗᐊᒃᑑᑎᐅᓗᐊᕐᑐᐃᑦ, ᓈᒻᒪᙱᓗᐊᕐᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᖃᕐᓂᖅ, ᐊᒻᒪᓗ ᒪᑯᐊ ᐊᑐᐊᒐᓕᕆᓂᐅᔪᑦ ᐊᒻᒪᓗ ᒪᓕᒐᓕᕆᓂᕐᒧᑦ ᐱᓕᕆᓂᐅᔪᖅ ᐊᑯᑦᑐᔫᑎᐅᓂᖓᓄᑦ ᐃᓄᖕᓂ ᐊᕐᓇᓂᒃ ᐊᒻᒪ ᕿᑐᕐᖓᖏᓐᓂᒃ ᐅᓗᕆᐊᓇᖅᑐᒦᒍᑎᐅᓂᕐᓴᐅᖃᑦᑕᕐᒪᑕ.
“ᑭᓇᑐᐃᓐᓇᖅ ᐊᕐᓇᖅ ᐋᓐᓂᖅᓱᖅᑕᐅᔪᖅ ᐊᐃᑉᐸᖓᓄᑦ ᐋᓐᓂᕐᓱᐃᓂᒃᑯᑦ ᓴᐳᑎᓯᒪᔭᕆᐊᖃᙱᓚᖅ ᐃᒻᒥᒃᓂᒃ ᐊᒻᒪ ᕿᑐᕐᖓᖏᓐᓂᒃ ᐸᓖᓯᓄᑦ ᓴᐳᔾᔭᐅᓯᒪᙱᓗᐊᕐᓂᕐᒧᑦ ᐅᕝᕙᓘᓐᓃᑦ ᕿᒫᕝᕕᖕᒧᐊᕆᐊᖃᓕᕐᓗᓂ ᐅᕝᕙᓘᓐᓃᑦ ᐃᑲᔪᖅᑕᐅᕕᖕᒧᑦ ᐅᓗᕆᐊᓇᖅᑐᒦᑦᑕᐃᓕᓂᕐᒧᑦ.
“30 ᐊᕐᕌᒎᓕᕐᑐᑦ ᐊᓂᒍᕐᓯᒪᓕᕋᓗᐊᕐᑎᓪᓗᒍ, ᐃᖅᑲᖅᑐᐃᕕᒡᔪᐊᒃᑯᑦ ᑲᓇᑕᒥᑦ ᐱᓕᕆᐊᖃᖅᑎᓪᓗᒋᑦ ᓚᕙᓖ ᐅᖃᓚᐅᕐᓯᒪᖕᒪᑕ ᐊᕐᓇᐃᑦ ᐊᐃᑉᐸᖏᓐᓄᑦ ᐋᓐᓂᖅᓱᖅᑕᐅᕙᒃᑐᑦ ᐃᖕᒥᖕᓂᒃ ᓴᐳᑎᓯᒪᔭᕆᐊᖃᕐᓂᖏᓐᓂᒃ.
“ᖃᓄᐃᓕᐅᕈᑎᒃᓴᑦ ᐊᐃᑉᐸᕇᒃ ᐱᑦᑎᐊᖃᑦᑕᐅᑎᒋᓗᐊᓕᕌᖓᑕ ᐃᒪᐃᑦᑕᕆᐊᖃᕐᑐᑦ:
- ᐃᓕᖅᑯᓯᑎᒍᑦ ᐊᒻᒪ ᓄᓇᓕᖕᓂ ᑐᙵᕕᖃᕐᓗᓂ;
- ᐃᑲᔪᖅᑕᐅᓯᒪᔪᖅ ᒪᑯᓄᖓ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐱᓕᕆᐊᒃᓴᑎᒍᑦ ᐊᒻᒪ ᐱᔨᑦᑎᕋᐅᑎᑎᒍᑦ, ᐃᓚᖃᕐᓗᓂ ᐃᑲᔫᑎᐅᔪᓐᓇᕐᑐᓂᒃ ᐊᒻᒪ ᑕᐃᒪᐃᑎᑦᑕᐃᓕᒍᑎᐅᔪᓐᓇᕐᑐᓂᒃ ᐊᑐᐊᒐᓕᕆᓂᕐᒥᒃ, ᐃᑲᔪᖅᑕᐅᓗᓂ ᐃᓱᒪᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅ, ᐅᓗᕆᐊᓇᓗᐊᕐᑐᓄᑦ ᐊᒻᒪ ᐊᑐᓗᐊᕐᓂᕐᒧᑦ; ᐃᑲᔫᑎᑖᕆᐊᖃᕐᓂᖅ ᓈᒻᒪᒃᑐᓂᒃ ᒐᕙᒪᐅᔪᓂᒃ, ᐊᒻᒪ
- ᐃᑲᔪᖅᑕᐅᓯᒪᓪᓗᓂ ᓯᕗᓕᐅᕐᑎᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐅᑯᑎᑐᓇᖅ ᐸᐅᒃᑑᑎᒃᑯᓐᓂᒃ ᐊᒻᒪᓗ ᐃᓐᓇᑐᖃᐃᑦ ᖃᐅᔨᒪᓪᓚᕆᒃᑕᖏᓐᓄᑦ.
“ᑕᐃᔅᓱᒪᓂ ᖃᓄᐃᓕᐅᕈᓘᔭᕐᓇᒥ ᔫᓂ 2017-ᒥᑦ ᕿᒫᕝᕕᒃᑕᖃᓚᐅᙱᒻᒪᑦ ᐅᐸᒡᕕᒃᓴᒥᓪᓘᓐᓃᑦ ᐅᖅᓱᖅᑑᒥᑦ, ᐃᓚᒋᔭᐅᔪᖅ 70 ᐳᓴᓐᑎᓂᒃ ᓄᓇᓕᖕᓂ ᐃᓄᐃᑦ ᓄᓇᖓᓂᒃ ᐅᐸᒡᕕᒃᓴᖃᙱᑦᑐᓂᒃ ᐊᕐᓇᓄᑦ ᐊᒻᒪ ᓄᑕᕋᕐᓄᑦ ᕿᒫᔪᓂᒃ ᐋᓐᓂᕐᓱᐃᔪᐊᓗᖕᓂᒃ.
“ᒐᕙᒪᑐᖃᒃᑯᑦ ᖃᖓᑦᑎᐊᓵᕈᓗᒃ ᐱᓂᐊᕐᓂᕋᕐᓯᒪᓂᖓ ᓴᓇᓂᐊᕐᓗᑎᒃ ᑕᓪᓕᒪᓂᒃ ᐃᓄᖕᓄᑦ ᑐᕌᖓᔪᓂᒃ ᐱᒋᐊᕈᑎᑦᑎᐊᕚᓘᕗᖅ. ᑭᓯᐊᓂᓕ, ᐅᓇ ᐅᖅᓱᖅᑑᒥ ᖁᕕᐊᓇᙱᑦᑐᐊᓗᒃ ᐊᑐᓚᐅᕐᑐᓪᓗᒍ ᑕᐃᒪᓕ ᐃᑲᔫᑎᑖᒃᑲᓐᓂᕆᐊᖃᕐᑐᑦ ᑐᐊᕕᕐᓇᖅᑐᒃᑯᑦ ᕿᒫᕝᕕᐅᔪᓐᓇᖅᑐᓄᑦ.
“ᐊᒻᒪᒃᑲᓐᓂᖅ, ᑐᐊᕕᕐᓇᖅᑐᓕᕆᓂᕐᒧᑦ ᑭᐅᔨᐅᕙᒃᑐᑦ ᐊᒻᒪᓗ ᐸᓖᓯᒃᑯᑦ ᐱᔨᑦᑎᕋᐅᑎᓕᕆᓂᖏᑦ ᓄᓇᓕᑦᑎᓐᓂᒃ ᑭᐅᑲᐅᖅᑐᕈᑎᐅᖃᑦᑕᕆᐊᖃᖅᑐᑦ ᐃᑲᔪᖅᑕᐅᔪᒪᔪᓂᒃ ᐊᒻᒪ ᓴᐳᑎᔭᐅᔪᒪᔪᓂᒃ, ᐃᓱᒪᒋᓪᓗᒍ ᑲᑉᐱᐊᓱᖕᓈᓘᓂᖓ ᐊᒻᒪ ᖃᓄᐃᓕᐅᕈᑎᐅᓕᔭᑦᑐᑦ ᐋᓐᓂᕐᓯᕆᓂᒃᑯᑦ ᐊᒻᒪ ᐱᑦᑎᐊᑲᑕᙱᓐᓂᒃᑯᑦ.”
— ᕇᐱᑲ ᑲᓪᓗ
– 30 –
ᐸᐅᒃᑑᑎᑦ ᑲᓇᑕᒥ ᑮᓇᐅᔭᓕᐅᕋᓱᙱᖢᑎᒃ ᑲᑐᔾᔨᖃᑎᒌᖑᔪᑦ ᑭᒡᒐᖅᑐᐃᔨᐅᓪᓗᑎᒃ ᐃᓄᖕᓂ ᐊᕐᓇᓂᒃ ᑲᓇᑕᒦᑦᑐᓂᒃ. ᐱᓇᓱᐊᒐᖃᖅᑐᑦ ᐅᔾᔨᕈᓱᓕᖅᑎᑦᑎᒃᑲᓐᓂᕐᓂᕐᒥᒃ ᐃᓄᐃᑦ ᐊᕐᓇᐃᑦ ᐱᔭᕆᐊᖃᕐᑕᖏᓐᓂᒃ, ᐊᒻᒪᓗ ᐃᓚᐅᑎᑕᐅᒃᑲᓐᓂᕈᓐᓇᕐᓂᖏᓐᓂᒃ ᓄᓇᓕᖕᓂᑦ, ᐊᕕᒃᑐᕐᓯᒪᓂᒃᑯᑦ ᐊᒻᒪ ᑲᓇᑕᒥᐅᑕᐅᓂᒃᑯᑦ ᐃᓱᒫᓘᑎᐅᕙᒃᑐᓄᑦ ᐃᓅᖃᑎᒌᖕᓂᕐᒧᑦ, ᐃᓕᖅᑯᓯᓕᕆᓂᕐᒧᑦ ᐊᒻᒪᓗ ᑮᓇᐅᔭᓕᐅᕋᓱᖕᓂᒃᑯᑦ ᐱᕙᓪᓕᐊᔪᓕᕆᓂᒃᑯᑦ.
ᖃᐅᔨᒋᐊᒃᑲᓐᓂᕈᒪᒍᕕᑦ ᐅᓇ ᐅᖃᕐᕕᒋᔪᓐᓇᕐᑕᑦ:
ᓲᓴᓐ ᑭᖕ, sking@pauktuutit.ca, 613-724-1518