ᒐᕙᒪᒃᑯᑦ ᐋᖅᑭᐅᒪᑎᑦᑏᓐᓇᕆᐊᓖᑦ ᐃᑲᔪᖅᑐᐃᓗᑎᑦ ᑲᓇᑕ ᐋᓐᓂᐊᖅᑕᐃᓕᒪᓂᕐᒧᑦ ᐱᖁᔭᖓᑕ ᑐᙵᕕᖏᖕᓂᑦ ᑲᒪᒋᔭᐅᖁᓪᓗᒋᑦ ᐃᓄᐃᑦ ᐊᒥᓱᑦ ᐊᐅᓚᑦᑎᒍᓯᕐᓂᑦ ᐊᔾᔨᒋᔭᐅᙱᓐᓂᖏᖕᓄᑦ ᑲᒪᒋᔭᐅᑲᒻᒪᓲᑦ ᐅᕕᓂᖏᑕ ᐊᒥᐊᖏᑦ ᐊᔾᔨᐅᒋᔭᐅᙱᑦᑐᑦ ᐱᔾᔪᑕᐅᓪᓗᑎᓪᓗ ᐋᓐᓂᐊᖅᑕᐃᓕᒪᔪᓕᕆᓂᕐᒥᒃ

ᐊᖓᔪᖅᑳᖅ ᑯᓪᓗ ᑮᓇᐅᔭᖃᖅᑎᑎᒃᑲᓐᓂᖁᔨᕗᖅ ᐱᐅᓯᕚᓪᓕᓂᖅᓴᐅᓂᐊᕐᒪᑕ ᐊᑦᑐᐃᓂᖃᕈᑎᒋᔭᐅᓲᑦ ᐋᓐᓂᐊᖅᑕᐃᓕᒪᓂᖏᖕᓄᑦ ᐃᓄᖕᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᐊᒻᒪᓗ ᐱᓕᕆᐊᖃᕈᑎᒋᔭᐅᓂᖅᓴᐅᓕᕐᓗᑎᑦ ᒪᒃᑯᒃᑐᑦ ᐃᓄᐃᑦ ᐋᓐᓂᐊᖅᑐᓕᕆᓂᕐᒥ ᐃᖅᑲᓇᐃᔭᖅᑐᑦ ᐊᒥᓲᓂᖅᓴᕈᕋᔭᕐᒪᑕ

English Version | Version française

ᐋᑐᕚ – ᒥᔅ ᕇᐱᑲ ᑯᓪᓗ, ᐊᖓᔪᖅᑳᖅ ᐸᐅᒃᑑᑏᑦ ᐊᕐᓇᐃᑦ ᑲᓇᑕᒥ, ᐅᖃᐅᓯᖃᓛᖅᐳᖅ ᖃᐅᑉᐸᑦ ᖃᓄᖅ ᑲᓇᑕᒥ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᖁᔭᖓ ᐃᓄᐃᑦ ᐊᕐᓇᓂᑦ ᓂᕕᐊᖅᓵᓂᓪᓗ ᐱᕚᓪᓕᑎᑦᑎᓂᖃᕈᑎᒋᔭᐅᙱᒻᒪᑦ, ᑲᓇᑕᒥ ᑲᑎᒪᖃᑕᐅᑎᓪᓗᒍ ᑲᒪᒋᔭᖃᕐᓗᓂ ᐅᕕᓂᑉ ᐊᒥᐊᖏᑦ ᐱᔾᔪᑎᒋᓪᓗᒋᑦ ᐊᔾᔨᒋᔭᐅᙱᑦᑐᑎᒍᑦ ᑲᒪᒋᔭᖃᓲᑦ ᐋᓐᓂᐊᖅᑕᐃᓕᒪᔪᓕᕆᓂᐅᔪᒥ.

ᑯᓪᓗ ᓴᖅᑮᓛᕆᕗᖅ ᐊᑐᓕᖁᔭᕐᒥᓂᒃ ᑲᒪᒋᔭᐅᖁᓪᓗᒍ ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓂᖏᑦ ᐃᓄᐃᑦ ᐊᕐᓇᐃᑦ ᓂᕕᐊᖅᓵᓪᓗ ᐋᓐᓂᐊᖅᑕᐃᓕᒪᔪᓕᕆᓂᕐᒥᒃ ᐊᑐᖅᑎᓪᓗᒋᑦ. ᐅᖃᐅᓯᖃᓗᐊᕋᔭᕐᒥᔪᖅ ᐊᒥᓱᓂᑦ ᐊᐅᓚᔾᔪᓯᕐᓂᒃ ᐃᓄᐃᑦ ᐅᕕᓂᖏᑕ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓂᖏᖕᓂᒃ ᐋᓐᓂᐊᖃᑦᑕᓂᖅᓴᐅᓕᓲᖑᓪᓗᑎᑦ ᐃᓄᐃᑦ ᐊᕐᓇᐃᑦ, ᑕᐃᒪᐃᙱᓐᓂᖅᓴᐅᑎᓪᓗᒋᑦ ᐊᓯᖏᑦ ᐊᕐᓇᐃᑦ ᑲᓇᑕᒥ.

ᐱᔾᔪᑕᐅᓗᐊᖅᑐᑦ ᐊᑐᓕᖁᔭᖏᑦ ᐱᖃᓯᐅᔾᔨᕗᑦ ᐅᑯᓂᖓ:

−ᑮᓇᐅᔭᖃᖅᑎᑕᐅᓂᖅᓴᐅᖃᑦᑕᕐᓗᑎᑦ ᖃᐅᔨᒪᓇᑦᑎᐊᖁᓪᓗᒋᑦ ᑐᙵᕕᖏᑦ ᑲᓇᑕᑉ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᖁᔭᖓ, ᐱᖃᓯᐅᑎᓪᓗᒍ ᐋᓐᓂᐊᖅᑐᓕᕆᕙᑦᑐᓂᑦ ᐊᑐᖅᑕᐅᔪᓐᓇᕐᓂᖏᑦ, ᑕᒪᐃᓐᓂᓕᒫᖅ ᖃᓄᐃᒍᑎᒋᔭᐅᖃᑦᑕᕐᓂᖏᑦ ᐊᒻᒪᓗ ᑕᒪᐃᓐᓂᓕᒫᕐᓗ ᐊᑐᐃᓐᓇᐅᒪᔪᐃᓐᓇᖃᑦᑕᕐᓗᑎᑦ ᐃᓄᖕᓄᑦ ᐊᕐᓇᓄᑦ ᓂᕕᐊᖅᓵᕐᓄᓪᓗ ᓇᓂᑐᐃᓐᓇᖅ ᓄᓇᖃᕋᓗᐊᕈᑎᑦ, ᐊᒻᒪᓗ ᑕᒪᒃᑯᐊ ᒪᑭᒪᒍᓐᓇᖅᑑᓗᑎᑦ ᐊᒻᒪᓗ ᓈᒻᒪᑦᑐᓂᒃ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐊᑐᕋᒃᓴᓂᑦ ᑮᓇᐅᔭᓂᓪᓗ ᐱᑕᖃᑦᑎᐊᖃᑦᑕᕐᓗᓂ ᐊᑐᓂ ᓄᓇᓕᐅᔪᓂᑦ.

−ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᑦᑕᐃᓕᒪᑎᑦᑎᓂᕐᒧᑦ ᐊᒻᒪᓗ ᐃᓕᖅᑯᓯᖏᑦ ᐊᔾᔨᒌᙱᓐᓂᖏᖕᓄᑦ ᐅᓗᕆᐊᓇᖅᑐᒨᖅᑕᐃᓕᒪᑎᑦᑎᒍᑏᑦ ᐃᓕᓐᓂᐊᖅᑐᓕᕆᓂᕐᒥᒃ ᐃᓕᓐᓂᐊᖅᑎᑕᐅᖃᑦᑕᕐᓗᑎᑦ ᖃᐅᔨᒪᓇᑦᑎᐊᖁᓪᓗᒋ ᐃᓄᐃᑦ ᓄᑕᖅᑲᑦ ᒪᒃᑯᒃᑐᓄᓪᓗ STEM ᐱᓕᕆᐊᕐᓂᑦ ᐃᓕᓐᓂᐊᖅᑎᑕᐅᒐᔭᕐᒪᑕ; ᖁᑦᑎᓂᖅᐹᓂᓗ ᐃᓕᓐᓂᐊᖅᑏᑦ ᐃᓅᓯᓕᕆᔭᐅᖃᑦᑕᕐᓗᑎᑦ ᐃᖅᑲᓇᐃᔮᖅᑖᕋᓱᐊᕈᓐᓇᐅᑎᓂᑦ ᐋᓐᓂᐊᕐᕕᒻᒥ ᐃᖅᑲᓇᐃᔮᕆᔭᐅᓲᓂᑦ; ᐊᑦᑕᓇᙱᑦᑑᓗᑎᑦ ᐊᒻᒪᓗ ᐃᑉᐱᒍᓱᑦᑎᐊᖅᑐᓂᒃ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᕕᖃᖃᑦᑕᕐᓗᑎᑦ; ᐊᒻᒪᓗ ᓘᒃᑖᓕᐊᕆᐊᕐᕕᐅᔪᓂᑦ ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐱᓪᓗᒋᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᖃᑦᑕᙱᓪᓗᑎᑦ ᐊᒻᒪᓗ ᓇᓕᒧᒌᙱᑦᑐᒃᑯᑦ ᑲᒪᒋᔭᐅᖃᑦᑕᙱᓪᓗᑎᑦ.

−ᐱᓕᒻᒪᒃᓴᖃᑦᑕᕐᓗᒋᑦ, ᐃᖅᑲᓇᐃᔭᖅᑎᑖᕆᔭᐅᓗᑎᑦ, ᐃᖅᑲᓇᐃᔭᖅᑎᒋᔭᐅᖏᓐᓇᓕᕐᓗᑎᑦ, ᐊᒻᒪᓗ ᐊᑐᓂ ᐃᓕᓴᐃᔨᖃᕐᓗᑎᑦ ᐃᑲᔪᖅᑐᐃᔨᒥᒃ ᐃᓕᓴᐃᔨᖃᖅᑎᑕᐅᓗᑎᑦ ᐃᓄᐃᑦ ᐃᖅᑲᓇᐃᔭᖅᑏᑦ ᐊᒻᒪᓗ ᐋᓐᓂᐊᕐᕕᒻᒥ ᐃᖅᑲᓇᐃᔭᖅᑐᑦ ᑕᒪᐃᓐᓂᓕᒫᖅ ᖁᑦᑎᓐᓂᖃᐅᖅᑐᓂᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ; ᐊᒻᒪᓗ ᐃᖅᑲᓇᐃᔭᕐᕕᖃᖅᑎᑕᐅᓗᑎᑦ ᐊᒻᒪᓗ ᐃᓕᓐᓂᐊᕐᕕᖃᖅᑎᑕᐅᓗᑎᑦ ᐃᓄᐃᑦ ᖃᐅᔨᒪᔭᐅᓂᖏᑦ, ᓯᕗᓕᖅᑎᐅᓂᖏᑦ ᐊᒻᒪᓗ ᐊᒃᓱᕈᕐᓇᖅᑐᓂᑦ ᐱᓕᕆᐊᖃᐅᖅᑐᑦ ᐱᒻᒪᕆᒋᔭᐅᖃᑦᑕᕐᓗᑎᑦ.

−ᐃᓕᖅᑯᓯᕐᒥᒃ ᐅᔾᔨᕈᓱᑦᑎᐊᕐᓂᖅ ᐊᒻᒪᓗ ᓈᒻᒪᑦᑐᒃᑯᑦ ᐱᓕᒻᒪᒃᓴᖃᑦᑕᕐᓗᑎᑦ ᖃᐅᔨᒪᑦᑎᐊᖁᓪᓗᒋᑦ ᑕᒪᐃᓐᓂ ᐃᓕᓐᓂᐊᖅᑏᑦ ᐋᓐᓂᐊᖅᑕᐃᓕᒪᔪᓕᕆᓂᕐᒥᒃ ᐃᓕᓐᓂᐊᖅᑐᑦ, ᐊᒻᒪᓗᑦᑕᐅᖅ ᐅᓪᓗᒥᐅᔪᖅ ᐋᓐᓂᐊᕐᕕᒻᒥ ᐃᖅᑲᓇᐃᔭᖅᑎᐅᔪᑦ, ᐃᓕᖅᑯᓯᕆᙱᑕᒥᓂᒃ ᐅᔾᔨᖅᓱᓂᕐᒧᑦ ᐱᓕᒻᒪᒃᓴᖅᑎᑕᐅᔭᕆᐊᓖᑦ ᐃᓄᐃᑦ ᐊᑐᖃᑦᑕᕐᓂᑯᕕᓂᖏᖕᓂᑦ ᐊᒻᒪᓗ ᐃᓕᖅᑯᓯᖓᓂᒃ. ᐃᓕᓐᓂᐊᖅᑏᑦ ᐊᒻᒪᓗ ᐋᓐᓂᐊᕐᕕᒻᒥ ᐃᖅᑲᓇᐃᔭᖅᑏᑦ ᐱᓕᒻᒪᒃᓴᖅᑎᑕᐅᔭᕆᐊᖃᕆᕗᑦ ᐊᕐᓇᐃᑦ ᐋᕐᓇᐅᓂᖏᖕᓄᑦ ᐋᓐᓂᖅᑎᖅᑕᐅᕙᓐᓂᖏᖕᓂᑦ. ᐊᒻᒪᓗ, ᑕᐃᒃᑯᐊ ᐃᖅᑲᓇᐃᔭᖅᑐᑦ ᐃᓄᐃᑦ ᓄᓇᓕᖏᖕᓂ ᐃᓄᒃᑐᑦ ᐅᖃᐅᓯᕐᒥᒃ ᐃᓕᓐᓂᐊᖅᑎᑕᐅᔭᕆᐊᖃᕐᒥᔪᑦ.

−ᐃᓄᐃᑦ ᑐᑭᓯᐅᒪᑎᑕᐅᓗᑎᑦ ᐋᓐᓂᐊᕐᕕᓕᐊᖅᑐᑦ − ᐃᓚᐅᑎᑕᐅᓗᑎᑦ ᐃᓐᓇᑐᖃᐃᑦ, ᓄᓇᓕᖕᓂ ᓯᕗᓕᖅᑏᑦ, ᐊᕐᓇᐃᑦ ᒪᒃᑯᒃᑐᓪᓗ ᐋᖅᑭᒃᓱᐃᑎᓪᓗᒋᑦ ᐊᒻᒪᓗ ᐊᐅᓚᑕᐅᑎᓪᓗᒋᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᕐᓂᑦ ᐱᔨᑦᑎᕋᕈᑎᓂᓪᓗ ᐃᓄᖁᑎᑦᑎᓐᓄᑦ ᐊᒻᒪᓗ ᓄᓇᓕᑦᑎᓐᓄᑦ.

“ᐃᓄᐃᑦ ᐊᕐᓇᓄᑦ ᓂᕕᐊᖅᓵᓄᓪᓗ, ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᔨᑦᑎᕋᕈᑎᖏᑦ ᐱᕚᓪᓕᖃᑦᑕᙱᒻᒪᑕ ᐊᑐᙱᑦᑐᑎᑦ ᐊᒥᓲᓂᖏᖕᓂᑦ ᑕᓪᓕᒪᑦ ᑐᙵᕕᖏᑦ ᑲᓇᑕᒥ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᖁᔭᕐᒥᒃ − ᐋᓐᓂᐊᖅᑕᐃᓕᒪᔪᓕᕆᔾᔪᑎᓂᒃ ᐊᑐᕐᓗᓂ, ᑕᒪᐃᓐᓅᖓᔪᓂᑦ ᑕᒪᐃᓐᓂᓕᒫᖅ ᖃᓄᐃᒍᑎᒋᔭᐅᖃᑦᑕᕐᓂᖏᑦ, ᑕᒪᐃᓐᓂᓕᒫᕐᓗ ᐊᑐᐃᓐᓇᐅᒪᔪᐃᓐᓇᖃᑦᑕᕐᓗᑎᑦ, ᓅᑕᐅᔪᓐᓇᕐᓂᖏᑦ, ᐊᒻᒪᓗ ᐃᓄᖕᓂᒃ ᑭᒃᑯᑐᐃᓐᓇᕐᓂᑦ ᐱᔨᑦᑎᕋᕐᓗᓂ ᐊᐅᓚᑦᑎᓂᖏᑦ,” ᐅᖃᖅᖢᓂ ᑯᓪᓗ. “ᑕᒪᓐᓇ ᐱᒻᒪᕆᐅᕗᖅ ᒐᕙᒪᑐᖃᒃᑯᑦ ᐱᖁᔭᕐᔪᐊᖓᑎᒍᑦ, ᑲᓇᑕᒥ ᐊᕕᑦᑐᖅᓯᒪᔪᑦ ᐊᒻᒪᓗ ᑲᓇᑕᑉ ᐅᑭᐅᖅᑕᖅᑐᖓᑕ ᐊᕕᑦᑐᖅᓯᒪᓂᖏᑦ ᐋᓐᓂᐊᕐᕕᓕᐊᕈᓐᓇᐅᑏᑦ ᓇᓪᓕᐅᒃᑯᒫᑦ ᐱᓕᕆᐊᖏᑦ ᒪᓕᒋᐊᓖᑦ ᖃᓄᐃᑦᑑᓂᖏᖕᓂᑦ ᐱᖁᔭᑉ ᒐᕙᒪᑐᖃᒃᑯᓐᓂ ᑮᓇᐅᔭᖅᑖᖅᑎᑕᐅᒍᓐᓇᖁᓪᓗᒋᑦ, ᒪᓕᑦᑐᒍ ᑲᓇᑕᒥ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐊᐅᓪᓛᖅᑎᑦᑎᖑᓯᖏᑦ.”

ᐊᐅᓚᑦᑎᒍᓯᖏᑦ ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓂᖏᖕᓄᑦ ᐱᔾᔪᑕᐅᓪᓗᐊᓲᖑᒋᕗᖅ ᐊᒥᓱᓄᑦ ᖃᐅᔨᒪᔭᐅᑦᑎᐊᖅᑐᓂ ᐋᓐᓂᐊᖅᑕᐃᓕᒪᑎᑦᑎᒍᑕᐅᓲᓄᑦ ᐱᖃᓯᐅᑎᓪᓗᒋᑦ ᐃᖅᑲᓇᐃᔭᕐᓂᖅ, ᐃᓕᓐᓂᐊᕐᓂᖅ, ᐃᖅᑲᖅᑐᐃᕕᓕᕆᓂᖅ ᐊᒻᒪᓗ ᑮᓇᐅᔾᔭᒃᓴᓂᖅ. ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓂᖏᑦ ᐱᐅᙱᑦᑐᒃᑯᑦ ᐊᑦᑐᐃᓂᖃᓲᑦ ᐃᓄᐃᑦ ᐃᓕᓐᓂᐊᖅᑏᑦ ᐃᓕᓐᓂᐊᕇᕈᓐᓇᖁᓪᓗᒋᑦ ᖁᑦᑎᓂᖅᐹᒥᒃ. ᑭᒡᓕᖃᖅᑎᑦᑎᓲᖑᒻᒥᔪᖅ ᑎᑭᓐᓇᓱᐊᖅᑕᖏᖕᓂᑦ ᓯᓚᑦᑐᓴᕐᕕᕐᔪᐊᕐᒥ ᐃᓕᓐᓂᐊᖅᑐᓂᑦ, ᐱᖃᓯᐅᑎᓪᓗᒋᑦ ᐋᓐᓂᐊᖅᑐᓕᕆᓂᕐᒥᒃ ᐃᖅᑲᓇᐃᔭᖅᑎᕈᕋᓱᐊᖅᑐᓂᑦ. ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓂᖏᑦ ᐊᑦᑐᐃᓂᖃᓪᓚᕆᓲᖑᖕᒥᔪᖅ ᐃᖅᑲᓇᐃᔭᕈᓐᓇᕐᓂᖏᑦ ᐊᒻᒪᓗ ᑭᒡᓕᖓᓅᖅᑎᑕᐅᓗᐊᓲᖑᓪᓗᑎᑦ ᐃᓄᐃᑦ ᐃᖅᑲᓇᐃᔭᕐᕕᓂ, ᐱᖃᓯᐅᑎᓪᓗᒋᑦ ᐊᑭᓕᖅᓱᖅᑕᐅᑦᑎᐊᓲᓂᑦ ᐃᖅᑲᓇᐃᔮᖃᕐᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ. “ᑕᒪᓐᓇᓕ ᓱᓕᕗᖅ, ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓂᖏᑦ ᐊᑐᖅᑕᐅᓲᑦ ᐃᓄᐃᑦ ᐊᕐᓇᐃᑦ ᐋᓐᓂᐊᕐᕕᓕᐊᓚᐅᙱᓐᓂᖏᖕᓂ ᐊᑦᑐᐃᓂᖃᓲᖅ ᐃᓅᓯᖓᓂᒃ ᑮᓇᐅᔭᓕᐅᕈᓐᓇᕐᓂᖓᓂᓪᓗ, ᑕᐃᒪᐃᑦᑎᓪᓗᒋᑦ ᐱᐅᙱᑦᑐᒃᑯᑦ ᐊᑦᑐᐃᓂᖃᓕᓲᖑᓪᓗᑎᑦ ᐋᓐᓂᐊᕐᕕᒻᒥ ᐃᓅᓕᓴᖅᑕᐅᓂᕆᒐᔭᖅᑕᖏᑦ ᐊᒻᒪᓗ ᐋᓐᓂᐊᕈᓐᓂᕈᓐᓇᕐᓂᖏᖕᓄᑦ,” ᐅᖃᖅᖢᓂ ᑯᓪᓗ.

ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᔨᑦᑎᕋᖅᑕᐅᑎᓪᓗᒋᑦ ᐃᓄᐃᑦ ᑐᙵᕕᒋᔭᐅᔪᒥᒃ ᐊᑐᖅᑐᖃᖅᐸᙱᓚᖅ ᑕᒪᐃᓐᓄᓕᒫᖅ ᖃᓄᐃᑦᑑᓂᕆᔭᕆᐊᖃᕐᓂᖏᖕᓂᑦ ᐋᓐᓂᐊᕐᕖᑦ ᑮᓇᐅᔭᖃᖅᑎᑕᐅᕙᙱᒻᒪᑕ ᓇᓕᒧᓐᓂᖃᖅᑐᒃᑯᑦ, ᐊᔾᔨᖃᕐᓗᑎᑦ ᓘᒃᑖᓕᐊᕐᕕᓄᑦ ᑲᓇᑕᑉ ᓂᒋᐊᓂ ᑮᓇᐅᔭᖃᖅᑎᑕᐅᓂᖅᓴᐅᓲᖑᓪᓗᑎᑦ. ᐃᓄᐃᓪᓗ ᑲᒪᒋᔭᐅᕙᙱᓚᑦ ᑕᐃᒫᒃᓴᐃᓐᓇᖅ ᐅᔾᔨᖅᓱᖅᑕᐅᑦᑎᐊᕐᓗᑎᑦ, ᑲᒪᒋᔭᐅᑦᑎᐊᕐᓂᖏᑦ ᐊᒻᒪᓗ ᐃᑉᐱᒋᔭᐅᑦᑎᐊᕐᓗᑎᑦ ᐊᓯᖏᑦ ᐋᓐᓂᐊᖅᑐᑦ ᐋᓐᓂᖅᑐᕕᓃᓪᓘᓐᓃᑦ ᑐᐊᕕᕐᓇᑐᒃᑯᑦ ᑕᑯᔭᐅᕝᕕᒻᒨᕋᐃᒻᒪᑕ, ᐃᑲᔪᖅᑕᐅᔪᒪᑎᓪᓗᒋᑦ ᐃᓱᒪᒃᑯᑦ ᐋᓐᓂᐊᖅᑐᑦ ᐊᒻᒪᓗ ᐋᙵᔮᕐᓇᖅᑐᓄᑦ ᐊᔪᕈᑎᖃᖅᑐᓄᑦ, ᐅᕝᕙᓘᓐᓃᑦ ᑲᒡᒍᑎᒧᑦ ᐃᓅᓕᓴᖅᑕᐅᑎᓪᓗᒋᑦ ᐊᓯᖏᓐᓄᓘᓐᓃᑦ ᐋᓐᓂᐊᑯᑖᒍᑎᒋᔭᐅᓲᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓪᓗᑎᑦ.

ᐆᑦᑑᑎᒋᓗᒍ, ᐊᑕᐅᓯᖅ ᓄᑲᑉᐱᐊᖅ ᑕᒻᒪᕈᑕᐅᓚᐅᖅᐳᖅ ᖃᓄᐃᓐᓂᕋᖅᑕᐅᓪᓗᓂ ᓘᒃᑖᕐᒧᑦ ᐃᖃᓗᓐᓂ ᐊᒻᒪᓗ ᓂᐊᖁᙳᓇᙱᑦᑐᒥᒃ ᑕᐃᓚᓈᑐᖅᑎᑕᐅᓪᓗᓂ. ᖃᓄᐃᓐᓂᖓᓂᒃ ᖃᐅᔨᔭᐅᒐᒥ ᓘᒃᑖᕐᒧᑦ, ᒪᓐᑐᕆᐊᓪ−ᒥ, ᑲᒡᒍᑎᖓ ᓯᐊᒻᒪᓗᐊᓕᓚᐅᖅᐳᖅ ᐃᓅᓯᖓ ᓇᖅᑮᒐᒃᓴᐅᒍᓐᓃᖅᑐᓂ. ᐊᒻᒪᓗᑦᑕᐅᖅ, ᐊᒥᓱᐊᖅᑎᖅᖢᑎᑦ ᐃᓚᒌᑦ ᑲᓇᑕᑉ ᓂᒋᐊᓅᕋᐃᒻᒪᑕ ᐃᑲᔪᖅᑕᐅᒋᐊᖅᑐᖅᖢᑎᑦ, ᑲᒪᒋᔭᐅᓲᑦ ᓯᓚᐃᑦᑐᒻᒪᕆᐅᓪᓗᑎᑦ ᓇᓕᒧᒌᑎᑦᑎᙱᑦᑐᑦ ᖃᐅᔨᒪᙱᓐᓂᑯᖏᖕᓄᑦ ᐊᒻᒪᓗ ᐅᕕᓂᑉ ᐊᒥᐊᖏᑦ ᐊᔾᔨᒋᔭᐅᙱᓐᓂᖏᖕᓄᑦ ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓲᖑᓪᓗᑎᑦ ᐋᓐᓂᐊᕐᕕᒻᒥ ᐃᖅᑲᓇᐃᔭᖅᑎᓄᑦ. ᐆᑦᑑᑎᒋᓪᓗᒍ, ᐊᑕᐅᓯᖅ ᐃᓄᒃ ᐊᕐᓇᖅ ᖃᐅᔨᓚᐅᖅᐳᖅ ᐃᕐᓂᖓᒎᖅ ᓇᔾᔨᐊᕆᔭᐅᓪᓗᓂ ᐃᒥᐊᓗᒻᒧᑦ ᐃᑦᑕᑕᖅᑕᐅᓯᒪᓗᐊᕐᒪᑦ ᓄᑕᖅᑲᓄᑦ ᓘᒃᑖᖅ ᑕᒻᒪᓚᐅᕋᒥ ᐃᓄᑉ ᑮᓇᐅᖓᑕ ᑕᐅᑦᑐᖓᓂᒃ ᐃᕐᔨᖓᓪᓗᑎᒃ ᐊᒻᒪᓗ ᐅᓗᐊᒃᑯᑦ ᓴᐅᓂᖏᒃ ᓇᔾᔨᐊᖑᓪᓗᓂ ᐃᒥᐊᓗᒻᒧᑦ ᐃᑦᑕᑕᖅᑕᐅᓯᒪᓱᕆᓕᖅᑕᒥᓂᕆᓪᓗᒍ.

ᐋᓐᓂᐊᖅᑕᐃᓕᒪᔪᓕᕆᓂᕐᓗ ᐱᕚᓪᓕᕈᑎᒋᔭᐅᕙᙱᓚᖅ ᑐᙵᕕᖓ ᑕᒪᐃᓐᓄᓕᒫᖅ ᐊᑐᖅᑕᐅᔭᕆᐊᖃᕈᑎᖓᓂᒃ ᓇᓕᒧᒌᑦᑐᒃᑯᑦ ᐊᑐᖅᑕᐅᔪᓐᓇᕐᓗᓂ ᑲᓇᑕᓗᒃᑖᕐᒥ ᐱᔨᑦᑎᕋᖅᑕᐅᓗᑎᑦ, ᐱᓗᐊᖅᑐᒥᒃ ᐅᖓᓯᑦᑐᒦᓐᓂᖅᓴᓄᑦ. ᐊᓯᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ ᑭᒡᓕᓯᓂᐊᕐᓂᖃᖅᑎᓪᓗᒋᑦ, ᐃᓚᒌᑦ ᓇᓗᓇᐃᖅᓯᕙᓚᐅᖅᐳᑦ ᐃᓄᐃᑦ ᓄᓇᖓᓐᓂ ᐋᓐᓂᐊᖅᑐᓕᕆᓂᖅ ᐱᐅᙱᑦᑑᒋᐊᖓᓂᒃ. ᐃᓚᖏᑦ ᐆᑦᑑᑏᑦ ᐅᖃᖅᑕᐅᕙᓚᐅᖅᑐᑦ: ᓰᖅᑯᒃᑯᑦ ᓄᑭᖓ ᑭᐱᓯᒪᔪᖅ, ᐳᕙᒡᓗᒃᑐᖃᖅᖢᓂ ᖃᐅᔨᔭᐅᙲᓐᓇᕐᓂᑯᑦ, ᐊᒻᒪᓗ ᐊᐅᒃᑯᑦ ᐸᑎᒃᑯᓪᓗ ᑲᒡᒍᑎᖃᕋᓗᐊᖅᑎᓪᓗᒍ ᖃᐅᔨᔭᐅᙲᓐᓇᕐᓂᑯᑦ. ᓂᐊᖁᙳᓇᙱᑐᖅᓯᐅᑎ ᑕᐃᓚᓈᓪ ᓇᓗᓇᐃᔭᖅᑕᐅᕙᓚᐅᖅᐳᖅ “ᐊᐅᐸᓪᓛᓂᐅᓂᖓᓂᒃ ᐃᓄᖕᓄᑦ”.

ᐋᓐᓂᐊᖅᑕᐃᓕᒪᔪᓕᕆᓂᖅ ᐃᓄᖕᓄᑦ ᐱᕚᓪᓕᕈᑎᒋᔭᐅᕙᙱᓚᖅ ᑐᙵᕕᖓᑦ ᐋᓐᓂᐊᕐᕕᒻᒧᑦ ᐅᐸᒍᑎᒍᓐᓇᕐᓂᖓᓂᒃ ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᕋᕈᑎᖏᑦ ᐊᑐᐃᓐᓇᐅᒪᕙᙱᒻᒪᑕ ᐃᓄᖕᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᓄᓇᓕᖏᖕᓂ. ᒪᕐᕉᒃ ᐆᑦᑑᑏᒃ ᐃᓱᒪᒃᑯᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᐱᔨᑦᑎᕋᕈᑎᑕᖃᖅᐸᙱᑦᑐᖅ ᐊᒻᒪᓗ ᓯᖓᐃᔪᓕᕆᓂᕐᒧᑦ ᐱᔨᑦᑎᕋᕈᑎᑕᖃᖅᐸᙱᑦᑐᖅ.

-30-

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒃᑲᕐᓗᒋᒃ:

ᓲᓴᓐ ᑭᖕ, 613-724-1518; 007susanking@gmail.com; ᐅᕝᕙᓘᓐᓃᑦ

ᐊᓐᑐᐃᓂᐊᑦ ᕗᕆᓐᑦ’ᐊᒨᕐ, 613-316-8943; abrindamour@pauktuutit.ca;