ᓯᑎᐱᕆ 24, 2020
ᐋᑐᕚ, ᐋᓐᑎᐅᕆᔪ
ᐊᖓᔪᖅᑳᖓᑦ ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, ᕇᐱᑲ ᑯᓪᓗ, ᐅᓪᓗᒥ ᐅᑯᓂᖓ ᐅᖃᐅᓯᒃᓴᖃᕐᕕᖃᖅᑲᐅᕗᖅ ᑲᓇᑕᑉ ᒐᕙᒪᖏᑕ ᐱᓇᓱᐊᒐᕆᓂᐊᕐᓂᕋᖅᓯᒪᔭᖏᖕᓄᑦ ᐅᓂᒃᑳᖏᖕᓄᑦ:
“ᐸᐅᒃᑑᑏᑦ ᐃᓄᐃᑦ ᑲᓇᑕᒥ ᑐᙵᓱᐊᑎᑦᑎᕗᑦ ᐱᓕᕆᐊᒃᓴᕆᔭᖓᓂᒃ ᑲᓇᑕᑉ ᒐᕙᒪᖓᑕ ᐱᓇᓱᐊᒐᕆᓂᐊᕐᓂᕋᖅᓯᒪᔭᖏᑦ ᐅᓂᒃᑳᖏᖕᓂ ᐱᐅᓯᕚᓪᓕᖅᑎᑦᑎᒍᒪᓪᓗᑎᑦ ᐊᑦᑕᓇᖅᑕᐃᓕᒪᑎᑕᐅᓂᖏᑦ ᐊᒻᒪᓗ ᖃᓄᐃᑦᑕᐃᓕᓂᖏᑦ ᐃᓄᐃᑦ ᐊᕐᓇᐃᑦ ᐃᓚᒌᓪᓗ. ᖁᔭᒋᔭᖃᕆᕗᒍᑦ ᒐᕙᒪᒃᑯᑦ ᐱᓕᕆᐊᖃᕐᓂᐊᕐᓂᕋᖅᓯᒪᓂᖏᑦ ᐃᓄᐃᑦ ᐊᒻᒪᓗ ᑕᒪᐃᓐᓂ ᑲᓇᑕᒥᐅᑕᐅᔪᑦ ᐊᑦᑕᓇᖅᑐᒦᑦᑕᐃᓕᑎᑕᐅᒐᓱᐊᕐᓂᐊᕐᖏᓂᖕᓂᑦ ᐊᒻᒪᓗ ᐃᑲᔪᖅᑐᖅᑕᐅᓗᑎᑦ ᓄᕙᒡᔪᐊᕐᓇᖅ-19 ᐊᐃᑦᑑᑖᓘᖃᑦᑕᑎᓪᓗᒍ”.
“ᐱᓗᐊᖅᑐᒥᒃ, ᑲᔪᖏᖅᓴᕈᑎᖃᖅᐳᒍᑦ ᑕᑯᓚᐅᖅᑎᓪᓗᑕ ᑲᒪᒋᓂᐊᕐᓂᕋᕐᓂᖏᖕᓂᑦ ᐸᐅᒃᑑᑎᒃᑯᑦ ᓯᕗᓪᓕᐅᑎᖁᔭᒥᓂᒃ ᐱᐅᓯᕚᓪᓕᖅᑎᑕᐅᓗᑎᑦ ᐊᕐᓇᐃᑦ ᐅᓗᕆᐊᓇᖅᑐᒦᖁᓇᒋᑦ ᑮᓇᐅᔭᖅᑎᒍᑦ ᐊᑐᖅᑐᖃᕆᐊᓵᒻᒪᕆᓪᓗᓂ ᕿᒫᕕᓐᓄᑦ ᐊᒻᒪᓗ ᐃᒡᓗᒃᓴᖅᑖᓛᕐᓂᐊᖅᑐᓄᑦ ᓇᔪᒐᕆᔭᐅᔪᓄᑦ. ᑕᒪᓐᓇ ᓇᓕᒧᓐᓂᖃᕐᒪᑦ ᑲᑐᔾᔨᖃᑎᒌᑦᑕ ᑐᐊᕕᕐᓇᖅᑐᒃᑯᑦ ᑮᓇᐅᔭᓂᑦ ᐊᑐᖁᔨᓯᒪᓂᕗᑦ $20 ᒥᓕᐊᓐ ᑮᓇᐅᔭᓂᒃ ᑕᓪᓕᒪᓂᒃ ᓄᑕᕐᓂᒃ ᐃᓄᐃᑦ ᓇᔪᒐᒃᓴᖏᖕᓂᑦ ᐊᖏᕐᕋᖃᙱᑦᑐᓄᑦ ᐊᒻᒪᓗ ᐊᑦᑕᓇᙱᑦᑐᓂᑦ ᕿᒫᕕᒃᓴᕆᒐᔭᖅᑕᖏᖕᓂᑦ ᐊᕐᓇᐃᑦ ᐊᒻᒪᓗ ᓄᑕᖅᑲᑦ, ᐃᓄᐃᑦ ᓄᓇᖓᓐᓂ, ᐊᒻᒪᓗ ᐋᑐᕚᒥ”.
“ᐸᐅᒃᑑᑎᒃᑯᑦ ᑲᔪᖏᖅᓴᖅᑕᐅᓯᒪᒋᕗᑦ ᒐᕙᒪᒃᑯᑦ ᑲᒪᒋᔭᖃᕐᓂᐊᕐᓂᕋᖅᓯᒪᓂᖏᖕᓂᑦ ᐳᑭᖅᑕᓕᒃᑯᑦ ᐃᓄᑐᐃᓐᓇᕐᓄᑦ ᐃᓚᒋᔭᐅᖃᑕᐅᓗᑎᑦ ᐅᐊᑦᑎᔭᐅᖃᑦᑕᕋᔭᕐᓂᖏᑦ ᓵᑕᐅᓯᒪᓗᑎᑦ, ᓄᓇᓕᖕᓄᑦ ᓯᕗᒃᑲᖅᑕᕈᑕᐅᓯᒪᔪᑦ ᐸᓖᓯᓕᕆᖔᕐᓗᑎᑦ, ᐊᒻᒪᓗ ᐱᐅᓂᖅᓴᒃᑯᑦ ᐱᓕᒻᒪᒃᓴᖅᑕᐅᖃᑦᑕᕐᓗᑎᑦ ᐳᑭᖅᑕᓕᒃᑯᑦ. ᑕᒪᒃᑯᐊ ᑲᒪᒋᔭᖃᕆᐊᕐᓂᕋᕐᓂᐊᖅᓯᒪᓂᖏᑦ ᓯᕗᒧᐊᔾᔪᔾᔭᐅᓂᐊᖅᐳᑦ ᐸᐅᒃᑑᑎᒃᑯᑦ 15-ᖑᔪᑦ ᐳᑭᖅᑕᓕᕆᓂᕐᒧᑦ ᐊᑐᓕᖁᓯᒪᔭᖏᑦ ᐊᑦᑕᓇᙱᑦᑐᒦᓐᓂᖅᓴᐅᖁᓪᓗᒋᑦ ᐅᓗᕆᐊᓇᖅᑐᒦᙱᓂᖅᓴᐅᓗᑎᓪᓗ ᐃᓄᐃᑦ ᐊᕐᓇᐃᑦ (ᒪᓕᑦᑐᒍ ᔮᓐᓄᐊᕆᒥ 2020 ᐅᓂᒃᑳᓕᐊᕆᔭᐅᓚᐅᖅᓯᒪᔪᖅ ᑲᒪᒋᔭᐅᓗᓂ ᐊᕐᓇᐅᓂᖏᖕᓄᑦ ᐋᓐᓂᖅᑎᖅᑕᐅᖃᑦᑕᕐᓂᖏᑦ ᐃᓄᐃᑦᐊᕐᓇᐃᑦ: ᕿᒥᕐᕈᓇᒃᑕᐅᓂᖏᑦ ᐳᑭᖅᑕᓕᒃᑦ ᐊᑐᐊᒐᖏᑦ ᐊᒻᒪᓗ ᑲᒪᒋᔭᖃᑦᑕᖅᑕᖏᑦ ᐃᖅᑲᓇᐃᔭᖅᑎᓪᓗᒋᑦ ᐃᓄᐃᑦᓄᓇᖓᓐᓂ)”.
“ᐊᒻᒪᓗᑦᑕᐅᖅ, ᐸᐅᒃᑑᑎᒃᑯᑦ ᖁᕕᐊᓱᑉᐳᑦ ᑕᑯᔭᕆᐊᒃᓴᖅ ᑲᒪᒋᔭᐅᓂᐊᕐᓂᕋᖅᓯᒪᓂᖏᖕᓂᑦ ᐊᓯᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ ᑲᓇᑕᒥ ᖃᓄᐃᓕᐅᕈᑎᒋᔭᐅᓂᐊᕐᓂᖏᑕ ᐸᕐᓇᐅᑎᖏᑦ ᓴᖅᑭᖅᑎᑕᐅᓯᒪᔪᑦ, ᐱᓴᕋᐃᒍᓐᓇᕐᓂᓕᒫᖏᑎᒍᑦ ᑲᒪᒋᔭᖃᕐᓗᑎᑦ. ᐋᖅᑭᓱᖅᑕᐅᓂᖓᑦ ᑕᒪᓐᓇ ᖃᓄᖅᑑᕈᑎ ᐃᓚᐅᖃᑕᐅᔪᖃᓪᓚᑦᑖᕆᐊᖃᕐᒪᑦ ᐃᓄᖕᓄᑦ ᓯᕗᒃᑲᖅᑕᖅᑕᐅᓯᒪᔪᓄᑦ ᑲᑐᔾᔨᖃᑎᒌᓄᑦ ᐊᒻᒪᓗ ᐃᑉᐱᒍᓱᓐᓂᖃᑦᑎᐊᕐᓗᓂ ᐊᓯᐅᓯᒪᔪᖁᑎᑦᑕ ᐃᓄᐊᖅᑕᐅᓯᒪᔪᖁᑎᑦᑕ ᐃᕐᓇᐃᑦ ᓂᕕᐊᖅᓵᓪᓗ ᐃᓚᒋᔭᖏᖕᓂ”.
“ᐊᒻᒪᓗᑦᑕᐅᖅ, ᑲᒪᒋᔭᐅᓂᐊᕐᓂᕋᖅᓯᒪᓂᖏᑦ ᐸᐃᕆᕕᖕᓄᑦ, ᐱᐅᓂᖅᓴᒃᑯᑦ ᐋᓐᓂᐊᖅᑐᓕᕆᔭᐅᖃᑦᑕᕐᓗᑎᑦ, ᐱᐅᓯᓂᖅᓴᐅᓗᑎᑦ ᓂᕿᖃᑦᑎᐊᕈᓐᓇᕐᓂᖏᑦ ᐊᑯᓂᐅᔪᒧᑦ ᐸᖅᑭᔭᐅᓂᖏᑦ, ᐱᖁᑎᕐᔪᐊᖃᙱᓗᐊᕐᓂᐊᓗᒃᐳᓪᓗ ᑲᒪᒋᔭᐅᓗᑎᑦ − ᐱᓗᐊᖅᑐᒥᒃ ᐊᑭᑐᓗᐊᙱᑦᑐᒥᒃ ᐊᑦᑕᕐᓇᙱᑦᑐᒥᓪᓗ ᐃᒡᓗᖃᖅᑎᑕᐅᓗᑕ − ᑲᒪᒋᔭᐅᓪᓚᑦᑖᕐᓗᓂᓗ ᐅᕕᓂᒃᑯᑦ ᐊᔾᔨᒋᔭᐅᙱᓐᓂᖏᖕᓄᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐊᒻᒪᓗ ᖃᓄᐃᓕᐅᕈᑎᖃᕐᓗᑎᑦ ᐊᑐᓕᖅᑎᑕᐅᓂᒃᓴᖓᓂᒃ ᓄᓇᕐᔪᐊᕐᒥ ᓄᓇᕐᔪᐊᕐᒥ ᓇᓗᓇᐃᖅᓯᓂᖏᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᖕᓂᑦ ᑐᙵᓱᐊᑎᖦᖢᑎᒍᑦ ᑐᓴᒐᒃᓴᐅᑦᑎᐊᖅᓯᒪᒋᕗᑦ”.
ᐸᐅᒃᑑᑏᑦ ᖁᕕᐊᓲᑎᖃᕆᕗᑦ ᒐᕙᒪᒃᑯᑦ ᖃᓄᐃᓕᐅᕐᓂᐊᖅᓯᒪᓂᖏᖕᓂᑦ ᐊᓯᖏᖕᓄᑦ ᐱᓕᕆᐊᓲᑦ ᐱᖃᑎᒋᔭᐅᓗᑎᑦ ᖃᓄᐃᓕᐅᕈᑎᖃᕆᐊᕐᓂᖏᖕᓂᑦ ᐊᒻᒪᓗ ᓇᖅᑮᑎᑦᑎᓗᑎᑦ ᐱᓕᕆᐊᖃᕐᓂᖅᓴᐅᓗᑎᑦ ᐊᕐᓇᓂᒃ, ᐱᖃᓯᐅᑎᓪᓗᒋᑦ ᐃᑲᔪᖅᑐᖅᑕᐅᓂᖅᓴᐅᓗᑎᑦ ᐊᕐᓇᐃᑦ ᑮᓇᐅᔭᓕᐅᕋᓱᐊᓲᑦ ᐊᒻᒪᓗ ᐋᖅᑭᒃᑕᐅᓗᓂ ᖃᓄᐃᓕᐅᕈᑎᖃᕐᓂᕐᒧᑦ ᐸᕐᓇᐅᑎ ᐊᕐᓇᓄᑦ ᐱᕙᓪᓕᐊᔪᓕᕆᓂᕐᒥ.
ᐱᓇᓱᐊᕈᓯᐅᓂᐊᖅᑐᓂᑦ ᓂᕆᐅᑉᐳᒍᑦ ᐃᓕᓐᓂᐊᒃᑲᓐᓂᕐᓗᑕ ᓇᓗᓇᐃᔭᑦᑎᐊᖅᓯᒪᔪᑯᓗᖏᖕᓂ ᑕᒪᒃᑯᓄᖓ ᐱᕐᔪᐊᖑᔪᓂᑦ ᖃᓄᐃᓕᐅᕐᓂᐊᕐᓂᕋᖅᓯᒪᓂᖏᖕᓂᑦ ᐊᒻᒪᓗ ᐃᖅᑲᓇᐃᔭᖃᑎᒋᓗᒋᑦ ᒐᕙᒪᒃᑯᑦ ᑕᒪᒃᑯᐊ ᑲᒪᒋᔭᖃᕐᓂᐊᕐᓂᕋᖅᓯᒪᓂᖏᑦ ᖃᓄᐃᓕᐅᕈᑕᐅᓪᓚᑦᑖᕐᓗᑎᑦ.
ᐸᐅᒃᑑᑎᒃᑯᑦ ᐅᐊᑦᑎᖃᑦᑕᕐᓂᐊᕆᕗᑦ ᐊᒻᒪᓗ ᑐᓴᕆᐊᖅᑎᑦᑎᖃᑦᑕᕐᓗᑎᑦ ᐃᓄᖕᓂᑦ, ᐊᒻᒪᓗᑦᑕᐅᖅ ᑲᓇᑕᒥᐅᑕᐅᔪᓂᑦ ᐱᓕᕆᐊᖃᕐᓂᐊᕐᓂᕋᖅᓯᒪᔪᑦ ᓴᐃᒻᒪᖃᑎᒌᖕᓂᕐᒧᑦ, ᓱᑲᓐᓂᖓᑕ ᐱᕙᓪᓕᐊᓂᖏᓪᓗ ᑲᒪᒋᔭᐅᓂᐊᕐᓂᕋᖅᓯᒪᔪᑦ ᐃᓄᐃᑦ ᐊᕐᓇᓄᑦ ᖃᓄᐃᓕᐅᕈᑎᒋᔭᐅᓗᑎᑦ ᒐᕙᒪᒃᑯᑦ ᐱᓇᓱᐊᒐᒃᓴᖏᑕ ᐅᖃᐅᑕᐅᓯᒪᓂᖏᖕᓂ.
-30-
ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒃᑲᕐᓗᒍ:
ᓲᓴᓐ ᑭᖕ, 007susanking@gmail.com; 613-724-1518