ᐊᐅᒡᒍᓯ 6, 2021, ᐋᑐᒑᒥ − ᐱᔭᒃᓴᕐᑖᕋᓱᐊᓂᕐᒧᑦ ᑕᑕᕆᔪᑎᒃᓴᑦ ᒫᓐᓇᒃᑯᑦ ᒪᑐᐃᖓᓕᕆᕗᑦ ᑐᕋᖓᔪᑦ ᑕᓪᓕᒪᓪᓗᐊᑕᕐᓄᑦ ᕿᒫᕕᒃᓴᓄᑦ ᐃᓄᐃᑦ ᐊᕐᓇᓄᑦ ᐊᒻᒪ ᕿᑐᖓᖏᓐᓄᑦ − ᐃᓄᐃᑦ ᓄᓇᖓᑦᓂ, ᑎᓴᒪᐅᔪᓂ ᐊᕕᒃᑐᕐᓯᒪᐅᕐᕕᖏᓐᓂ ᐊᑐᓂᑦ ᐊᑕᐅᓯᕐᒥᒃ ᕿᒫᕕᒃᑖᓗᑎᒃ ᐊᒻᒪ ᐊᑕᐅᓯᕐᒥᒃ ᐋᑐᒑᒥ − ᑕᒪᓐᓇ ᐃᓄᐃᑦ ᕿᒫᕕᒃᓴᕐᕈᑎᒃᓴᖏᑦ ᐅᖃᐅᓯᐅᓚᐅᕐᓯᒪᖕᒪᑦ ᐸᐅᒃᑑᑎᒃᑯᑦ ᐊᕐᕋᒍᑕᒫᕐᓯᐅᑎᖓᓂ ᑲᑎᒻᒪᑎᓪᓗᒋᑦ ᔭᓐᓄᐊᕆ 2021ᒥ.
ᐸᐅᒃᑑᑎᒃᑯᑦ ᐅᓪᓗᒥ ᖃᕆᓴᐅᔭᒃᑯᑦ ᐊᓚᒃᑲᐃᖃᐅᕗᑦ ᐱᓇᓱᐊᖃᑕᐅᔪᒪᔪᓄᑦ ᑐᑭᓯᒋᐊᕐᕕᒃᒥᑦ ᖃᓄᖅ ᑕᑕᑎᕆᒋᐊᖃᓐᓂᐊᕐᒪᖔᑕ, ᑕᑕᑎᕐᑕᐅᒋᐊᓖᑦᓗ ᐊᑐᐊᒐᖏᓐᓂᒃ, ᐊᑐᓂᑦᓗ ᐊᑐᕐᑕᐅᒋᐊᓖᑦ ᐊᒻᒪ ᑐᑭᓯᐅᒪᑦᔪᑕᐅᒋᐊᒃᑲᓂᕐᔪᑏᑦ. ᐃᓗᓐᓇᑎᒃ ᑐᑭᓯᐅᒪᑦᔪᑎᒃᓴᒫᑦ ᐊᒻᒪ ᑎᑎᕋᕐᓯᒪᔪᓕᒫᑦ ᒫᓐᓇᒫᒃᑯᑦ ᐊᑐᐃᓐᓇᕈᕐᑎᑕᐅᓂᐊᕐᑐᑦ ᐃᓄᒃᑐᑦ ᐊᒻᒪ ᐅᐃᕖᑐᑦ. ᐊᑐᐃᓐᓇᕐᑕᖃᒻᒥᔪᖅ ᖃᕆᓴᐅᔭᒃᑯᑦ ᑐᕋᕈᑎᒥᒃ ᑐᑭᓯᒋᐊᕐᕕᒃᓴᒥᒃ ᖃᓄᖅ ᑮᓇᐅᔭᕐᓯᓂᐊᕐᑐᖃᕈᓐᓇᕐᒪᖔᑦ ᐊᑑᑎᖃᕋᔭᕐᑐᓂᒃ ᐱᔭᕇᕐᓯᑦᔪᑎᒃᓴᒫᓂᒃ ᑕᑕᑎᕆᐊᓕᒃᓄᑦ. ᒫᓐᓇᒃᑯᑦᓕ ᑖᓐᓇ ᖃᕆᓴᐅᔭᒃᑯᑦ ᒪᑉᐱᕐᑐᕋᐅᔪᖅ ᐊᑐᐃᓐᓇᑑᕗᖅ ᑕᑕᑎᕆᕕᐅᔪᓐᓇᕐᑐᑐᒃᓱᓂ ᐱᓇᓱᐊᖃᑕᐅᔪᒪᔪᓄᑦ ᐃᓄᓐᓇᕐᓄᑦ ᑐᕋᖓᔪᓂᒃ ᕿᒫᕕᒃᓴᒫᖏᓄᑦ.
ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐊᖓᔪᖅᑳᖓᑦ ᕆᐱᑲ ᖃᓪᓗ ᐅᖃᓚᐅᕐᑐᖅ ᐊᑯᓂᒎᖅ ᒐᕙᒪᑐᖃᒃᑯᓐᓂᑦ ᐅᖃᐅᑦᔨᒋᐊᖃᑦᑕᕐᓂᑰᓕᕐᒪᑕ ᕿᒫᕕᒃᓴᓕᐅᖁᓪᓗᒋᑦ ᐃᓄᐃᑦ ᐊᕐᓇᖏᓐᓄᑦ.
ᖁᕕᐊᓱᒃᐳᒍᑦ ᑕᒪᑐᒧᖓ ᐱᓇᓱᐊᕈᓐᓇᕐᓯᑕᐃᓐᓇᕋᑦᑕ ᐊᒻᒪ ᓂᕆᐅᒋᔭᑦᓴᖃᓕᕐᐳᒍᑦ ᐊᑑᑎᖃᓪᓚᑦᑖᓂᐊᕐᑐᑦ ᐃᓄᐃᑦ ᐊᕐᓇᖏᓐᓄᑦ ᐊᒻᒪ ᕿᑐᖓᖏᓐᓄᑦ ᒪᑐᐃᕈᓐᓇᕐᓯᓂᐊᕐᒪᑕ ᐊᑦᑕᓇᖏᑦᑐᕖᒃᕕᒃᓴᖏᑦ ᐊᒻᒪ ᕿᓚᒻᒥᐅᔪᒥᔪᒃᑯᑦ ᒪᑐᐃᖁᓇᕐᓱᑎᒃ. ᓯᕗᓂᒃᓴᑎᓐᓂᑦᑕᐅᖅ ᐃᓱᒪᒋᔭᖃᕋᓗᐊᕆᕗᖓ ᐊᓚᒃᑲᐃᓇᓱᐊᕐᓂᕐᒥᑦ ᕿᒫᕕᒃᒦᑦᑐᖃᓚᐅᕐᑎᓪᓗᒍ ᐱᑕᖃᖁᓪᓗᒍ ᓇᔪᒐᐅᑲᐃᓐᓇᕈᓐᓇᕐᑐᓂᒃ ᐃᓪᓗᑖᕐᓚᑦᑖᓚᐅᖏᓐᓂᖏᓐᓂ ᐊᓐᓂᕐᑎᕐᑕᐅᑕᐃᓕᒪᖁᑦᓱᒋᑦ ᐊᒻᒪ ᑕᒪᓐᓇ ᐱᓕᒻᒪᑦᓴᕈᑕᐅᓂᐊᕐᒪᑦ ᐱᕙᓪᓕᕈᑕᐅᒋᐊᕐᓗᓂᓗ ᐃᓄᒃᓄᑦ ᐃᑲᔪᕐᑕᐅᒋᐊᓕᒃᓄᑦ.
ᐃᓄᐃᑦ ᐊᕐᓇᐃᑦ ᐊᒻᒪ ᕿᑐᖓᖏᑦᓗ ᐊᒻᒪ ᑕᐃᒃᑯᐊ ᐊᓯᐊᒍ ᐃᓕᖅᑯᓯᓖᑦ ᐊᓐᓇᐅᔭᐃᑦ ᐅᑦᕙᓘᓐᓃᑦ ᐊᖑᑕᐅᔭᐃᑦ ᐊᒻᒪ ᐊᓯᖏᑦ ᐊᑲᐅᖏᓕᐅᕈᑎᖃᕐᐸᒻᒪᑕ ᐊᒻᒪ ᐊᔪᕈᑎᖃᕐᐸᒻᒪᑕ ᓇᔪᒐᓴᖏᓐᓂᒃ ᐊᑦᑕᓇᑦᑕᐃᓕᒪᕕᒃᓴᖏᓐᓂᒃ. ᑕᐃᒃᑯᐊ ᐊᕐᓇᐅᓂᖏᓐᓄᑦ ᐅᑦᕙᓗ ᓇᓪᓕᐊᖑᓂᖏᓐᓄᑦ ᐊᓐᓂᑎᕐᑕᐅᕙᒃᑐᑦ ᑕᐃᒫᒃ ᕿᒫᕕᒃᒨᔪᓐᓇᕐᓂᖏᑦ ᓱᕐᓗ ᐱᒋᐊᕈᑕᐅᕙᒃᐳᖅ ᓇᒻᒥᓂᖅ ᐃᓅᓯᕐᒥᓐᓂᒃ ᐊᑲᐅᓯᕙᓪᓖᒋᐊᕐᓂᕐᒥᒃ ᐊᒻᒪ ᓇᒻᒥᓂᖅ ᓴᐳᑎᔪᓐᓇᕐᓯᓗᑎᒃ ᐊᓐᓂᑎᕐᑕᐅᑕᐃᓕᒪᔪᓐᓇᕐᓯᓱᑎᒃ.
ᐸᐅᒃᑑᑎᒃᑯᑦ 36ᓂᒃ ᐊᕐᕋᒍᓂᒃ ᕿᓄᑦᔪᑎᖃᖃᑦᑕᓚᐅᕐᑎᓪᓗᒋᑦ, ᒐᕙᒪᑐᖃᒃᑯᑦ ᐅᑭᐊᑦᓵᖅ ᑭᓇᐅᔭᕐᓂᒃ ᒪᑭᑦᕙᓪᓗᕈᑎᓴᓕᐊᓂᒃ ᐊᓚᒃᑲᐃᓚᐅᕐᓯᒪᔭᖏᑎᒍᑦ ᑕᒪᓐᓇ ᐃᓚᒋᔭᐅᓚᐅᕐᒪᑦ $20−ᒥᓕᔭᓐᑖᓚᐃᑦ ᕿᒫᕕᒃᓴᓕᐅᕈᑎᒃᓴᒫᑦ, ᑕᒪᓐᓇ ᐊᑑᑎᖃᑎᒃᓯᒋᐊᕈᑕᐅᑦᓱᓂᓗ ᓄᓇᖃᖅᑳᕐᓯᒪᔪᑦ ᐃᓕᖅᑯᓯᑐᖃᕐᑎᒎᓂᕐᓴᐅᓗᑎᒃ ᐃᑲᔪᕐᑕᐅᓂᕐᓴᐅᖃᑦᑕᕈᓐᓇᖁᓪᓗᒋᑦ ᑕᐃᒃᑯᐊ ᐊᕐᓇᐃᓂᖏᑎᒍᑦ ᐅᑦᕙᓗ ᖃᓄᐃᑦᑑᓂᖏᑎᒍᑦ ᐊᓐᓂᕐᑎᕐᑕᐅᑦᔪᑎᖃᕐᐸᑦᑐᑦ. ᑕᒪᓐᓇ ᐱᒋᐊᕐᑎᑕᐅᓂᑰᔪᖅ ᑲᓇᑕᒥ ᐃᓪᓗᓕᕆᔨᕐᔪᐊᒃᑯᖏᓐᓄᑦ ᐊᒻᒪ ᒐᕙᒪᑐᖃᒃᑯᑦ ᓄᓇᖃᖅᑳᕐᓯᒪᔪᓕᕆᔨᒃᑯᖏᓐᓄᑦ. ᑲᓇᑕᒥ ᐃᓪᓗᓕᕆᔨᕐᔪᐊᒃᑯᑦ ᑭᓇᐅᔭᓂᒃ ᐊᑐᐃᓐᓇᖃᕐᑎᒃᓯᓂᐊᕐᑐᑦ ᑕᒪᒃᑯᐊ ᑭᓇᐅᔭᐃᑦ ᐊᑐᕐᑐᐊᕐᑎᒃᓯᑦᔪᑕᐅᓗᑎᒃ ᐊᒻᒪ ᐊᑐᕐᑐᐊᕈᑎᒥᓃᑦ ᐃᓗᓐᓇᑎᒍᑦ ᐊᑭᓕᓴᕐᑖᕈᑕᐅᒋᐊᑐᒐᑎᒃ ᐅᑎᕐᑎᑕᐅᑦᓴᐃᓐᓇᕆᐊᑐᖏᑦᑐᑦ ᐊᑐᕐᑕᐅᓂᐊᕐᑐᑦ ᓄᑖᓂᒃ ᓴᓇᑦᔪᑕᐅᓗᑎᒃ ᐅᑦᕙᓗ ᐃᓕᓗᑐᖃᕐᓂᒃ ᓄᑖᕈᕐᑎᒃᓯᑦᔪᑕᐅᒋᐊᕐᓗᑎᒃ ᕿᒫᕕᒃᓴᓕᐅᕈᑕᐅᓗᑎᒃ ᓄᑖᓂᒃ. ᒐᕙᒪᑐᖃᒃᑯᑦ ᓄᓇᖃᖅᑳᕐᓯᒪᔪᓕᕆᔨᒃᑯᖏᑦ ᐊᑐᐃᓐᓇᐅᑎᒃᓯᓂᐊᕐᑐᑦ ᐊᐅᓚᒃᓯᑦᔪᑕᐅᕙᓐᓂᐊᕐᑐᓂᒃ ᕿᒫᕕᒃᓄᑦ ᑕᒪᓐᓇ ᑭᓇᐅᔭᖃᕐᑎᒃᓯᓂᖅ ᑲᔪᓯᐅᒪᐃᓐᓇᕐᓗᓂᓗ.
ᑕᒪᓐᓇ ᑲᔪᓯᑎᑕᐅᓂᖓ ᐃᓄᐃᑦ ᐊᕐᓇᓄᑦ ᕿᒫᕕᒃᓴᖏᓐᓂᒃ ᓴᖅᑭᕐᑕᐅᓂᖏᑦ ᐊᓚᒃᑲᕐᑕᐅᕗᖅ ᒪᓕᒃᓱᒋᑦ ᑲᓇᑕᓕᒫᒥ ᐱᓐᓇᓱᐊᕐᑕᐅᖁᔭᐅᓯᒪᔪᑦ ᐸᕐᓇᐅᑏ ᐱᑦᔪᑎᐅᑦᓱᓂ ᐊᑦᑕᓇᖏᑦᑐᒥᑎᑕᐅᒋᐊᖃᓐᓂᖅ ᑖᒃᑯᓇᓂ ᑎᑎᕋᕐᓯᒪᔭᐅᔪᖅ 231ᖑᔪᑦ ᐊᑐᓕᕐᑕᐅᖁᔭᐅᔪᑦ ᐊᖅᑭᒋᐊᕈᑕᐅᖁᔭᐅᓯᒪᔪᑦ.
ᐊᑐᐃᓐᓇᕐᑕᖃᒻᒥᔪᖅ ᑭᓇᐅᔭᕐᑑᑎᒃᓴᓂᒃ ᐊᑑᑎᐅᔪᓐᓇᕐᑐᓂᒃ ᐱᓇᓱᖃᑕᐅᔪᒪᔪᓄᑦ ᑕᑕᑎᕆᔪᑦᑎᒃᓴᒫᑦ.
ᑲᓇᑕᐅᑉ ᐃᓪᓗᓕᕆᔨᕐᔪᐊᑯᖏᓐᓂᒃ ᐊᑐᐃᓐᓇᐅᕗᑦ ᑮᓇᐅᔭᕐᑑᑎᐅᔪᓐᓇᕐᑐᑦ ᐊᑭᓕᒃᓴᕐᑖᕈᑕᐅᒋᐊᑐᒐᑎᒃ ᐃᑲᔫᑏᑦ ᐊᑐᕐᑕᐅᔪᓐᓇᕐᑐᑦ ᐸᕐᓇᑦᔪᑕᐅᑐᐃᓐᓇᓂᕐᒧᑦ. ᑕᒪᒃᑯᐊ ᐸᕐᓇᒃᔪᑎᐅᔪᑦ ᐅᑯᓂᖓ ᐸᕐᓇᒃᔪᑎᐅᔪᓐᓇᕐᑐᑦ ᖃᓄᖅ ᐊᐅᓚᒃᓯᔪᖃᕋᔭᕐᒪᖓᑦ, ᖃᓄᖅ ᑎᑎᕐᑑᔭᕐᓯᒪᓂᖏᑦ ᕿᒫᕕᒃᓴᒫᑦ, ᓄᓇᒧᑦ ᐊᒻᒪ ᐃᓪᓗᓕᐅᓂᕐᒧᑦ ᐱᔪᓐᓇᐅᑎᓕᕆᓂᕐᒨᖓᔪᓂᒃ ᐊᒻᒪ ᐊᓯᖏᓐᓄᑦ ᐊᑑᑎᐅᒋᐊᓕᒃᓄᑦ.
ᑐᑭᓯᒋᐊᕐᔪᑎᒃᓴᑦ ᐸᕐᓇᐃᓂᕐᒧᑦ ᑭᓇᐅᔭᕐᑑᑎᒃᓴᒫᓄᑦ ᐊᒻᒪ ᖃᕆᔭᐅᔭᒃᑯᑦ ᑐᕋᐃᓐᓇᕈᑎᖏᑦ ᐅᖃᓕᒫᕐᑕᐅᒋᐊᓕᒃᓄᑦ ᑐᑭᓯᐅᒪᑦᔪᑎᐅᒋᐊᓕᒃᓄᑦ ᑕᒪᒃᑯᐊ ᑲᓇᑕᒥ ᐃᓪᓗᓕᕆᔨᕐᔪᐊᖁᖏᑦᑕ ᖃᕆᔭᐅᓴᑯᑦ ᑐᕋᕈᑎᖓ ᐅᓇ: web site.
ᑐᑭᓯᕚᓪᓗᕈᑏᑦ
- 2020ᖑᑎᓪᓗᒍ ᒐᕙᒪᑐᖃᒃᑯᑦ ᐅᑭᐊᑦᓵᖅ ᑭᓇᐅᔭᕐᓂᒃ ᒪᑭᑦᕙᓪᓗᕈᑎᓴᓕᐊᓂᒃ ᐊᓚᒃᑲᐃᓚᐅᕐᓯᒪᖕᒪᑕ ᓴᖅᑮᑦᓱᑎᒃ $724.1−ᒥᓕᔭᓂᒃ ᐊᑐᕐᑕᐅᓂᐊᕐᑐᓂᒃ ᐊᓐᓂᕐᑎᕐᑕᐅᑕᐃᓕᑎᒃᓯᓂᕐᒧᑦ ᐸᕐᓇᐅᑎᐅᔪᓂᒃ ᑕᒪᓐᓇ ᐱᕙᓪᓕᕈᑕᐅᓕᐊᕐᒪᑦ ᐱᕕᖃᕐᕚᓪᓕᕈᑕᐅᓕᕐᓗᓂ ᑲᔪᓯᐅᒪᑦᔪᑕᐅᓕᕐᓗᓂᓗ ᓄᓇᖃᖅᑳᕐᓯᒪᔪᑦ ᐃᓕᖅᑯᓯᑎᖒᖓᓂᕐᓴᐅᓕᖅᓗᑎᒃ ᐃᑲᔪᖅᑕᐅᕙᓐᓂᖏᑦ ᓄᓇᖃᖅᑳᕐᓯᒪᔪᑦ ᐊᕐᓇᐃᑦ ᕿᑐᖓᖏᑦᓗ ᐊᒻᒪ ᑕᐃᒃᑯᐊ ᐊᓯᖏᑦ ᐱᐅᓯᓖᑦ ᐊᕐᓇᐅᔭᐃᑦ ᐊᖑᑕᐅᔭᐃᑦᓗ ᐊᓯᖏᑦᓗ, ᑕᐃᒪᐃᑦᑑᓂᖏᑦᓄᑦ ᐊᓐᓂᑎᕐᑕᐅᓚᕿᕙᒃᑐᑦ. ᑕᒪᓐᓇ ᐸᕐᓇᐅᑎᐅᔪᖅ ᐃᑲᔪᕐᓯᕚᓪᓕᕈᑎᐅᓂᐊᕐᑐᖅ ᓄᑖᓂᒃ ᐊᓪᓚᓄᑦ, ᐃᓄᒃᓄᑦ ᐊᒻᒪ ᐊᓪᓚᖓᔪᓄᑦ ᕿᒫᕕᒃᓴᒫᓂᒃ ᐊᒻᒪ ᕿᒫᕕᒃᒦᓚᐅᕐᑐᓄᑦ ᓇᔪᒐᒃᓴᒫᓂᒃ ᑲᓇᑕᒥ, ᐊᓪᓚᐃᑦᓗ ᓄᓇᖏᓐᓂ ᐊᒻᒪ ᐅᑭᐅᕐᑕᕐᑐᒥ ᐊᒻᒪ ᑕᒪᒃᑯᐊ ᐊᓯᖏᓐᓂ ᓇᔪᕐᑕᐅᕙᓕᕐᑐᓂ.
- ᑕᐃᒃᑯᐊ ᐊᓯᖏᑦ ᐱᓇᓱᐊᕈᑎᒃᓴᑦ ᓄᓇᖃᖅᑳᕐᓯᒪᔪᓄᑦ ᕿᒫᕕᒃᓴᖏᓐᓄᑦ ᑐᕋᖓᖏᑦᑐᑦ ᐃᓄᓐᓇᕐᓄᑦ ᕿᒫᕕᒃᓴᒫᖏᓐᓄᑦ ᑕᒪᓐᓇ ᑭᓯᐊᓂ ᒪᑐᐃᕋᔭᕐᑐᖅ ᐅᑭᐊᑦᓵᖑᓕᖅᑲᑦ ᑲᓇᑕᒥ ᐃᓪᓗᓕᕆᔨᕐᔪᐊᑯᖏᑦᑕ ᖃᕆᓴᐅᔭᒃᑯ ᒪᑉᐱᕐᑐᕋᖓᓐᓂ.
-30-
ᐱᕙᓪᓕᐊᔪᓕᕆᔩᑦ ᑐᑭᓯᒋᐊᒃᑲᓐᓂᕈᓐᓇᕐᑐᑦ ᐅᕗᖓ communications@pauktuutit.ca.