Select Page

ᓄᑖᒥᒃ ᑮᓇᐅᔭᖃᖅᑎᑕᐅᓂᖏᑦ ᕿᒫᕝᕖᑦ ᐊᒻᒪᓗ ᐊᓯᐊᓄᑦ ᐃᒡᓗᑖᖅᑎᑦᑎᓂᕐᓄᑦ, ᓄᖅᑲᐃᑦ ᑲᒪᒋᔭᐅᓂᖏᓐᓄᑦ ᐊᓪᒪᓗ ᐃᓕᓐᓂᐊᖅᑎᑕᐅᓂᖏᓐᓄᑦ ᐱᐅᓯᒋᐊᖅᓯᓂᐊᖅᑐᖅ ᐊᑦᑕᕐᓇᖅᑐᖃᙱᑦᑐᒦᑎᑕᐅᓂᖏᑦ ᐊᒻᒪᓗ ᐱᕈᖅᐸᓪᓕᐊᓂᖃᕐᓂᕐᒧᑦ ᒥᐊᓂᕆᔭᐅᓂᖏᑦ ᐃᓄᐃᑦ ᐊᕐᓇᐃᑦ ᐊᒻᒪᓗ ᓂᕕᐊᖅᓯᐊᑦ

ᐋᑐᕚ, ᐄᐳᕆ 19, 2021 – ᐸᐅᒃᑑᑭᒃᑯᑦ ᖁᕕᐊᓱᒃᑐᑦ ᐅᑉᓗᒥ ᑮᓇᐅᔭᖅᑑᑎᒥᑦ ᑮᓇᐅᔭᖃᖅᑎᑕᐅᓂᐊᕐᓂᖓᓐᓄᑦ ᓴᓇᔭᐅᓂᐊᕐᓗᓂ ᐊᒻᒪᓗ ᐊᐅᓛᖅᑎᑦᑎᓂᕐᒥᑦ ᐊᓯᐊᓂᑦ ᐃᒡᓗᖃᖅᑎᑦᑎᓂᕐᒥᑦ ᑐᕌᖓᑉᓗᓂ ᐃᓄᐃᑦ ᐊᕐᓇᓄᑦ.  ᑮᓇᐅᔭᖃᖅᑎᑕᐅᓂᐊᕐᓂᖓᑦ ᑮᓇᐅᔭᖅᑑᑎᒥᑦ ᐃᓚᒋᔭᐅᔪᖅ ᓄᑖᖅ ᑮᓇᐅᔭᖃᖅᑎᑕᐅᓂᖅ ᐃᓄᖕᓄᑦ ᑐᕌᖓᔪᒥᑦ ᕿᒫᕝᕕᖕᓄᑦ ᑐᓴᖅᑎᑦᑎᔾᔪᑕᐅᓚᐅᖅᑐᖅ ᒐᕙᒪᑐᖃᒃᑯᓐᓄᑦ ᐅᑭᐅᖅ ᐱᒋᐊᓵᖅᑎᓪᓗᒍ.

ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥᑦ ᐱᔫᒥᑦᑕᒃᑐᑦ ᑮᓇᐅᔭᖅᑑᑎᑦᒥᑦ ᑮᓇᐅᔭᖃᖅᑎᑕᐅᓂᐊᕐᒪᑕ ᐊᓯᐊᓂᑦ ᐃᒡᓗᖃᖅᑎᑦᑎᓂᕐᒥᑦ ᐊᒻᒪᓗ ᕿᒫᕝᕕᖕᓄᑦ ᐃᓄᐃᑦ ᐊᕐᓇᖏᓐᓄᑦ ᐊᒻᒪᓗ ᒐᕙᒪᑐᖃᒃᑯᑦ $2.2 ᐱᓕᔭᓐ ᐃᓱᓕᑎᓐᓂᐊᕐᓗᒋᑦ ᐱᑦᑎᐊᖅᑕᐅᖏᓯᒪᓂᖏᑦ ᓇᓂᔭᐅᓂᖅ ᐊᔪᖅᑐᑦ ᐊᒻᒪᓗ ᐃᓄᐊᖅᑕᐅᔪᑦ ᓄᓇᖃᖅᑳᖅᑐᑦ ᐊᕐᓇᐃᑦ ᐊᒻᒪᓗ ᓂᕕᐊᖅᓯᐊᑦ,” ᐅᖃᖅᑐᖅ ᕆᐱᑲ ᑲᓪᓗᒃ, ᐊᖓᔪᖅᑳᖅ ᐸᐅᒃᑑᑎᒃᑯᓐᓄᑦ.

ᐊᖓᔪᖅᑳᖅ ᐅᖃᖅᑐᖅ ᐸᐅᒃᑑᑎᒃᑯᑦ ᖁᕕᐊᓱᓚᐅᕐᒥᔪᑦ ᑮᓇᐅᔭᖅᑑᑎᒥᑦ ᐃᓚᐅᖕᒪᑦ ᓄᑖᖅ ᑮᓇᐅᔭᖃᖅᑎᑕᐅᖏᓐᓇᕐᓂᐊᕐᓂᖓ ᐊᑭᑐᓗᐊᖏᑦᑐᒃᑯᑦ ᓄᑕᖅᑲᐃᑦ ᑲᒪᒋᔭᐅᓂᖏᓐᓄᑦ ᑐᕌᖓᔪᒥᑦ, ᐃᓄᖕᓄᑦ ᑐᕌᖓᔪᖅ ᑮᓇᐅᔭᖃᖅᑎᑕᐅᓂᖓ ᓱᕈᓰᑦ ᐃᓕᓐᓂᐊᓕᓵᖅᑎᓄᑦ, ᐊᒻᒪᓗ ᑮᓇᐅᔭᒃᑲᓐᓂᖃᖅᑎᑕᐅᓂᖅ ᓯᓚᑦᑐᖅᓴᕐᕕᖕᒥᑦ ᐃᓕᓐᓂᐊᕈᖕᓇᕐᓂᖏᓐᓄᑦ ᐃᓄᐃᑦ ᐊᕐᓇᐃᑦ.

“ᑮᓇᐅᔭᖃᖅᑎᑕᐅᓂᖅ ᐊᖏᒡᓕᒋᐊᕐᓂᖓ ᐃᓄᐃᑦ ᐋᓐᓂᐊᖃᖅᑕᐃᓕᒪᓂᖏᑦ ᑲᒪᒋᔭᐅᓂᖏᓐᓄᑦ ᐱᕕᖃᖅᑎᑦᑎᓂᕐᒥᒃ ᐱᑕᖃᒃᑲᓐᓂᕐᓂᖅᓴᐅᓗᑎᒃ ᐱᓕᕆᐊᖏᑦᑕ ᐃᕐᓂᓱᒃᓱᐃᔩᑦ ᓄᓇᓕᖕᓂᑦ ᐃᓄᐃᑦ ᓄᓇᖓᓐᓂᑦ,” ᑲᓪᓗᒃ ᐅᖃᖅᑐᖅ.  “ᐸᐅᒃᑑᑎᒃᑯᑦ ᐱᓕᕆᔪᖕᓇᖅᓯᔪᑦ ᑕᐃᒪᐅᖏᓐᓇᕐᓂᐊᖅᑐᒥᑦ ᒐᕙᒪᑐᖃᒃᑲᓐᓂᑦ ᑮᓇᐅᔭᖃᖅᑎᑕᐅᓗᑎᒃ ᐊᔪᕈᖕᓃᖅᓴᐃᓂᕐᒧᑦ ᐃᕐᓂᓱᒃᓱᐃᔨᐅᓂᐊᖅᑐᓂᑦ ᐃᓄᐃᑦ ᐊᕐᓇᖏᓐᓄᑦ.  ᑕᐅᑐᒐᖃᕐᓂᐊᕐᒥᔪᒍᑦ ᐅᔾᔨᕈᓱᒃᑎᑦᑎᒃᑲᓐᓂᕐᓂᐅᔪᒥᑦ ᐊᒻᒪᓗ ᐃᑲᔪᖅᑕᐅᓂᕐᒥᑦ ᐃᓂᐅᔪᓂᑦ ᐊᒻᒪᓗ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᐅᓚᑦᑎᔨᐅᔪᓂᒃ ᐊᒻᒪᓗ ᐊᓯᖏᓐᓂᑦ — ᓲᕐᓗ ᐃᖢᐊᖅᓴᐃᔨᓂᑦ ᐊᒻᒪᓗ ᓇᔭᙳᐊᓂᑦ — ᐱᒻᒪᕆᐅᔪᒥᑦ ᐱᓕᕆᐊᖃᕐᓂᖏᑦ ᐃᓄᐃᑦ ᐃᕐᓂᓱᒃᓱᐃᖃᑦᑕᖅᑐᑦ ᑲᒪᔭᖃᕐᓂᐊᕐᓗᑎᒃ ᐃᒃᐱᒍᓱᒡᕕᐅᓂᖃᖅᑐᒃᑯᑦ ᓯᖓᐃᔪᓂᒃ ᐋᓐᓂᐊᖃᖅᑕᐃᓕᒪᓂᕐᒧᑦ ᐱᔨᑦᑎᕋᐅᑎᓂᒃ ᐊᕐᓇᓄᑦ ᓄᓇᓕᑉᑎᖕᓃᑦᑐᓄᑦ,” ᑲᓪᓗᒃ ᐅᖃᖅᑐᖅ.

ᐸᐅᒃᑑᑎᒃᑯᑦ ᐅᖃᐅᓯᖃᓚᐅᕐᒥᔪᑦ ᐱᒻᒪᕆᐅᓂᖓᓄᑦ ᑮᓇᐅᔭᒃᑲᓐᓂᕐᓂᒃ ᐱᓗᑎᒃ ᓂᕿᖃᑦᑎᐊᖅᑎᑦᑎᓂᕐᒧᑦ, ᑕᒪᐃᓐᓄᑦ ᐃᓄᐃᑦ ᓄᓇᖓᓐᓂᑦ ᐊᒻᒪᓗ ᖃᑉᓗᓈᑦ ᓄᓇᖓᓐᓃᑦᑐᓂᑦ.  “ᖃᐅᔨᒪᔪᒍᑦ ᐊᒥᓱᑦ ᐃᓄᐃᑦ ᐊᕐᓇᖏᑦ ᑲᓇᑕᐅᑉ ᐃᓗᐊᓃᑦᑐᑦ ᐊᒃᓱᕈᖃᑦᑕᖅᑐᑦ ᓂᕿᑦᑎᐊᕙᖕᓂᒃ ᓂᕿᖃᖅᑎᓐᓂᐊᕐᓗᒋᑦ ᓄᑕᖅᑲᖏᑦ.  ᑮᓇᐅᔭᖅᑑᑎ ᐅᑉᓗᒥ ᑐᓴᖅᑎᔾᔪᑕᐅᖅᑲᐅᔪᖅ ᑐᑭᖃᖅᑐᖅ ᐸᐅᒃᑑᑎᒃᑯᑦ ᐃᑲᔪᖃᑦᑕᕐᓂᑎᒃ ᑲᔪᓯᔪᖕᓇᕐᓂᐊᕐᒪᑦ ᑲᒪᔨᓪᓚᑦᑖᖑᔪᓂᑦ ᖃᑉᓗᓈᓂᑦ ᐃᓄᖕᓄᑦ ᑲᑐᔾᔨᖃᑎᒌᖑᔪᓂᑦ ᐃᑲᔪᖃᑦᑕᖅᖢᑎᒃ ᐃᓄᐃᑦ ᖃᑕᙳᑎᒌᓂᑦ ᐊᒃᑐᖅᑕᐅᕐᔪᐊᖅᓯᒪᔪᑦ ᓄᕙᒡᔪᐊᕐᓇᕐᒧᑦ,” ᑲᓪᓗᒃ ᐅᖃᖅᑐᖅ.

ᐸᐅᒃᑑᑎᒃᑯᓐᓄᑦ, ᐊᖏᓂᖅᓴᒥᑦ ᑮᓇᐅᔭᖃᖅᑎᑕᐅᓂᖓᑦ ᓄᓇᖃᖅᑳᖅᑐᑦ ᐊᕐᓇᓄᑦ ᐊᒻᒪᓗ 2SLGBTQQIA+ ᐱᓕᕆᖃᑎᒌᓄᑦ ᑮᓇᐅᔭᖅᑑᑎᒥᑦ ᑐᑭᖃᖅᑐᖅ, ᓯᕗᓪᓕᖅᐹᒥᑦ 36 ᐅᑭᐅᑦ ᑕᐃᒪᙵᓂᒥᑦ, ᐱᓕᕆᖃᑎᒌᑦ ᐊᒥᓱᓄᑦ ᑮᓇᐅᔭᖃᖅᑎᑕᐅᓂᐊᓕᖅᑐᑦ ᐊᐅᓛᖅᑎᑦᑎᓂᕐᒧᑦ ᒐᕙᒪᑐᖃᒃᑯᓐᓄᑦ.  “ᑕᐅᑐᒐᐅᔪᑦ ᐊᒻᒪᓗ ᐃᓱᒪᒋᔭᐅᔪᑦ ᐃᓄᐃᑦ ᐊᕐᓇᓄᑦ, ᐊᕐᓇᐅᓂᕐᒧ ᐊᖑᑕᐅᓂᕐᒧᑦ ᖃᐅᔨᓴᐃᓃᑦ (GBA+), ᓴᖅᑭᑕᐅᔭᕆᐊᖃᖅᑐᓗᒃᑖᑦ ᓵᖏᓐᓄᑦ ᐅᕙᑉᑎᖕᓂᑦ ᐃᓱᒪᓕᐅᕈᑎᖃᖃᑦᑕᖅᑐᓄᑦ,” ᑲᓪᓗᒃ ᐅᖃᒃᑲᓐᓂᖅᑐᖅ.  “ᐊᔪᙱᓐᓂᐊᖅᑐᖅ ᑮᓇᐅᔭᖃᖅᑎᑕᐅᓂᖅ ᐸᐅᒃᑑᒃᑯᓐᓂᑦ ᐊᖏᓂᖅᓴᒥᒃ ᐊᒃᑐᖅᓯᓂᖃᕐᓂᐊᖅᑐᑦ ᒐᕙᒪᓕᕆᓂᕐᒥᑦ, ᐃᓅᖃᑎᒌᓂᑦ ᐊᒻᒪᓗ ᐱᕈᖅᐸᓪᓕᐊᓂᕐᒧᑦ ᐃᓱᒪᓕᐊᓄᑦ ᐊᒃᑐᖅᓯᓯᒪᔪᑦ ᐃᓄᐃᑦ ᐊᕐᓇᓄᑦ; ᐃᑲᔪᕐᓂᐊᖅᑐᖅ ᐊᓯᐊᙳᖅᓯᓂᕐᒥᑦ ᐋᓐᓂᐊᖃᖅᑕᐃᓕᒪᓂᕐᒧᑦ, ᐃᒡᓗᓕᕆᓂᕐᒧᑦ, ᐃᓕᓐᓂᐊᖅᑎᑦᑎᓂᕐᒧᑦ, ᐱᓕᕆᐊᒃᓴᓄᑦ ᐊᒻᒪᓗ ᐃᖄᑎᒌᑦ ᒥᐊᓂᕆᔭᐅᓂᖏᓐᓄᑦ ᐃᓄᐃᑦ ᐊᕐᓇᓄᑦ ᐊᒻᒪᓗ ᓂᕕᐊᖅᓯᐊᓄᑦ, ᐅᖃᖅᑐᖅ.                                           

“ᑕᒪᐃᓐᓄᑦ, ᑮᓇᐅᔭᖅᑑᑎ 2021 ᑕᑯᒃᓴᐅᑎᑦᑎᔪᖅ ᒐᕙᒪᑐᖃᒃᑯᑦ ᐱᒋᐊᖅᑎᒃᑲᓐᓂᖅᑕᖓᑦ ᖃᓄᐃᓕᐅᕈᑕᐅᓂᐊᖅᑐᑦ ᐱᔭᕆᐊᖃᒻᒪᕆᒃᑐᖅ ᐃᓄᐃᑦ ᐊᕐᓇᓄᑦ, ᐃᓚᐅᑉᓗᑎᒃ MMIWG-ᑯᑦ ᖃᐅᔨᓴᐃᓂᖓᓐᓂᑦ ᖃᐅᔨᔭᐅᔪᑦ, ᐱᐅᓯᕚᓪᓕᖅᑎᑦᑎᑦᑎᐊᕐᒥᔪᖅ ᐸᐅᒃᑑᑎᒃᑯᑦ ᑕᑯᓯᒪᔭᖏᓐᓂᑦ ᒐᕙᒪᒃᑯᓐᓂᑦ ᑕᐃᒪᙵᓂᐅᔪᒥᑦ,” ᑲᓪᓗᒃ ᐅᖃᖅᑐᖅ.

ᐊᖓᔪᖅᑳᖅ ᑲᓪᓗᒃ ᖁᕕᐅᒋᓚᐅᕐᒥᔭᖏᑦ ᐅᐱᓐᓇᖅᑐᖅ ᑯᕆᔅᑎᐊ ᕗᕇᓚᓐ (Hon. Chrystia Freeland) ᐊᒻᒪᓗ ᐊᐱᓐᓇᖅᑐᖅ ᒨᓇ ᕗᐊᑎᔩ (Hon. Mona Fortier) ᓯᕗᓪᓕᖅᑎᐅᑉᓗᑎᒃ ᐱᓕᕆᐊᖏᓐᓄᑦ ᑲᒪᔭᖃᖅᖢᑎᒃ ᓯᕗᓪᓕᖅᐹᒥᒃ ᒐᕙᒪᑐᖃᒃᑯᑦ ᑮᓇᐅᔭᖅᑑᑎᖓᓐᓂᑦ ᐊᕐᓇᐅᔪᒧᑦ ᑮᓇᐅᔭᓕᕆᓂᕐᒧᑦ ᒥᓂᔅᑕᒧᑦ ᐊᒻᒪᓗ ᐊᕐᓇᐅᔪᒧᑦ ᐃᓚᒋᔭᖓ ᑮᓇᐅᔭᓕᕆᓂᕐᒧᑦ ᒥᓂᔅᑕᒧᑦ. 

“ᐋᖅᑭᑐᐃᓐᓇᖅᑑᓇᓱᒋᙱᑕᕋ ᐱᑦᑕᐅᓛᖑᔪᓄᑦ ᑮᓇᐅᔭᖅᑑᑎᓕᕆᐊᖑᔭᕆᐊᕐᒪᑦ ᐃᓄᐃᑦ ᐊᕐᓇᓄᑦ ᐋᖅᑭᒃᑕᐅᑉᓗᓂ ᐊᒻᒪᓗ ᑲᒪᒋᔭᐅᑉᓗᓂ ᒪᕐᕉᖕᓄᑦ ᐊᕐᓈᖕᓄᑦ,” ᑲᓪᓗᒃ ᐅᖃᖅᑐᖅ.  

ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥᑦ ᑲᓇᑕᒥᑦ ᑮᓇᐅᔭᓂᒃ ᐱᕈᖅᑎᑦᑎᓇᓱᙱᖦᖢᑎᒃ ᐱᓕᕆᖃᑎᒌᖑᔪᑦ ᑭᒡᒐᖅᑐᖅᖢᒋᑦ ᑕᒪᕐᒥᓗᒃᑖᑦ ᐃᓄᐃᑦ ᐊᕐᓇᖏᑦ ᑲᓇᑕᒥᑦ.  ᒐᕙᒪᑐᖃᒃᑯᑦ ᑮᓇᐅᔭᖅᑑᑎᖓ 2021-ᒧᑦ ᑎᑭᑉᐸᓪᓕᐊᑉᓗᑎᒃ, ᐸᐅᒃᑑᑎᒃᑯᑦ ᐱᓕᕆᐊᖃᖅᓯᒪᔪᑦ ᐅᔾᔨᖅᑐᕐᓂᖅᓴᐅᑉᓗᑎᒃ ᐊᔾᔨᒌᙱᑦᑐᒃᑯᑦ ᐱᔭᐅᔭᕆᐊᖃᖅᑐᓂᒃ ᐃᓄᐃᑦ ᐊᕐᓇᓄᑦ.  ᖃᓄᐃᓕᐅᕐᓂᐅᔪᓂᑦ ᐃᓚᐅᔪᑦ:

ᑐᓂᓯᓂᖅ ᓯᕗᓂᐊᒍᑦ ᑮᓇᐅᔭᖅᑑᑎᓕᕆᓂᐅᑉ ᒐᕙᒪᑐᖃᒃᑯᑦ ᑲᑎᒪᕝᕕᕐᔪᐊᖓᓐᓂᑦ ᑲᑎᒪᔨᕋᓛᒃᑯᓐᓄᑦ ᑮᓇᐅᔭᓕᕆᓂᕐᒧᑦ

ᑲᑎᒪᖃᑎᖃᖅᖢᑎᒃ ᒥᓂᔅᑕᐅᑎᓂᑦ ᐃᓚᐅᑉᓗᑎᒃ ᐅᐱᓐᓇᖅᑐᖅ ᒨᓇ ᕗᐊᑎᔩ (Hon. Mona FortierH, ᐃᓚᒋᔭᐅᔪᖅ ᑮᓇᐅᔭᓕᕆᓂᕐᒧᑦ ᒥᓂᔅᑕᒧᑦ; ᐅᐱᓐᓇᖅᑐᖅ ᑭᐅᕈᓕᓐ ᐱᐊᓂᑦ (Hon. Carolyn Bennett), ᒦᓂᔅᑕ ᓄᓇᖃᖅᑳᖅᑐᓕᕆᔨᒃᑯᓐᓄᑦ; ᐅᐱᓐᓇᖅᑐᖅ ᒫᒃ ᒥᓗ (Hon. Marc Miller), ᒥᓂᔅᑕ ᓄᓇᖃᖅᑳᖅᑐᓄᑦ ᐱᔨᑦᑎᕋᐃᔨᒃᑯᓐᓄᑦ; ᐅᐱᓐᓇᖅᑐᖅ ᑖᓐ ᕙᓐᑖᓪ (Hon. Dan Vandal), ᒥᓂᔅᑕ ᐅᑭᐅᖅᑕᖅᑐᓕᕆᔨᒃᑯᓐᓄᑦ; ᐊᒻᒪᓗ ᐅᐱᓐᓇᖅᑐᖅ ᒥᐅᕆᔭᒻ ᒫᓯᐊᕝ (Maryam Monsef), ᒥᓂᔅᑕ ᐊᕐᓇᓄᑦ ᐊᒻᒪᓗ ᐊᕐᓇᐃᑦ ᐊᖑᑏᑦ ᐊᔾᔨᒌᒃᑎᑦᑎᓂᕐᒧᑦ ᐊᒻᒪᓗ ᐱᕈᖅᐸᓪᓕᐊᓂᕐᒥᑦ ᐱᔭᓪᓕᐊᓂᕐᒧᑦ; ᐊᒻᒪᓗ ᐊᑭᕋᖅᑐᖅᑏᑦ ᐊᒻᒪᓗ ᒪᓕᒐᓕᐅᖅᑎᐅᔪᑦ ᒪᓕᒐᓕᐅᕐᕕᒡᔪᐊᕐᒥᑦ.

ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐱᓕᕆᐊᒃᓴᐃᑦ ᐃᓄᓗᒃᑖᓂᒃ ᐅᔾᔨᕈᓱᓕᖅᑎᑦᑎᓂᐊᕐᓗᓂ ᐃᓄᐃᑦ-ᐱᕈᖅᐸᓪᓕᐊᓂᕐᒧᑦ ᓈᒻᒪᙱᑦᑐᒃᑯᑦ ᐊᔾᔨᒌᙱᓐᓂᐅᔪᓂᒃ ᐃᓄᐃᑦ ᐊᕐᓇᖏᓐᓄᑦ, ᑕᐅᑐᖔᖅᖢᒋᑦ ᐊᓯᖏᑦ ᐊᕐᓇᐃᑦ ᑲᓇᑕᒦᑦᑐᑦ. 

-30-

ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᒍᕕᑦ, ᖃᐅᔨᒋᐊᕐᕕᒋᓗᒍ:

ᓲᓴᓐ ᑭᖕ (Susan King): 613.724.1518 / sking@pauktuutit.ca

ᐅᕝᕙᓘᓐᓃᑦ

ᑳᑎ ᐅᐃᑎᑯ (Cathie Whittaker): 613.762.7729 / cwhittaker@pauktuutit.ca

Share This