Select Page

ᓯᕗᓪᓕᐅᑎᑕᐅᔭᕆᐊᖃᖅᐳᑦ ᑮᓇᐅᔭᓂᑦ ᐊᑐᑲᐅᑎᒋᓗᑎᑦ ᐊᑦᑕᓇᙱᑦᑐᒦᖁᓪᓗᒋᑦ ᐃᓄᐃᑦ ᐊᕐᓇᐃᑦ, ᐅᖃᐅᑕᐅᓯᒪᓪᓚᑦᑖᑦᑎᐊᖅᑐᓂ ᔫᓂ 2019−ᒥ ᐊᓯᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ ᑭᒡᓕᓯᓂᐊᖅᓯᒪᔪᓂᑦ ᐅᓂᒃᑳᖏᖕᓂ

ᐋᑐᕚ, ᓯᑎᐱᕆ 14, 2020 – ᒪᕐᕉᒃ ᐱᓇᓱᐊᕈᓯᑐᐃᓐᓇᐅᓘᓕᖅᑑᒃ ᑲᒥᓯᓇᐅᑉ ᒪᑐᐃᕆᐊᙵᕈᑎᖏᑦ ᐅᓂᒃᑲᐅᑕᐅᓛᓕᖅᑎᓪᓗᒋᑦ, ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑐᐊᕕᕐᓇᖅᑑᑎᑦᑎᓪᓗᑎᑦ ᐊᔭᐅᕆᕗᑦ ᑲᓇᑕᑉ ᓯᕗᓕᖅᑎᕐᔪᐊᖓᓂᑦ ᔭᔅᑎᓐ ᑐᕉᑐᒥᒃ ᐊᒻᒪᓗ ᒥᓂᔅᑕᖓᑦ ᒐᕙᒪᑐᖃᒃᑯᑦ−ᓄᓇᖃᖅᑳᖅᓯᒪᔪᓄᑦ, ᓂᕈᐊᖅᑕᐅᓯᒪᔪᖅ ᑭᐅᕈᓕᓐ ᕕᐊᓇᑦ, ᐱᖃᓯᐅᔾᔨᖁᓪᓗᒋᑦ ᖃᐅᔨᔭᒃᓴᐅᑲᐅᑎᒋᔪᓂᑦ ᐃᑲᔪᖅᑐᐃᔾᔪᑎᒃᓴᓂᑦ ᐃᓄᖕᓄᑦ ᐊᕐᓇᓄᑦ ᓄᑖᕐᒃᒥ ᐱᒋᐊᖅᑎᑦᑎᒋᐊᒃᑲᓐᓂᕐᓂᐊᓕᕐᒥᑎᓪᓗᒋᑦ ᓯᕗᓪᓕᐅᑎᖁᔭᒥᓂᒃ ᒐᕙᒪᕆᔭᖓᓂᒃ.

ᓯᕗᓪᓕᖅᐹᖅ ᐊᒻᒪᓗ ᑲᒪᒋᔭᐅᑲᐅᑎᒋᖁᔭᐅᔪᖅ, ᐸᐅᒃᑑᑎᒃᑯᑦ ᑲᔪᖏᖅᓴᐃᔪᒻᒪᕆᐅᕗᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᓂᑦ ᐊᑐᑲᐅᑎᒋᒐᔭᕐᓗᑎᑦ $20 ᒥᓕᐊᓐᓂᒃ ᓴᓇᔭᐅᖁᓪᓗᒋᑦ ᑕᓪᓕᒪᑦ ᕿᒫᕖᑦ ᐊᒻᒪᓗ ᐃᒡᓗᑖᕐᓂᐅᓴᔪᓄᑦ ᐅᑕᖅᑭᕕᐅᔪᑦ ᐊᕐᓇᓄᑦ ᕿᑐᕐᖓᖏᓐᓄᓪᓗ ᐃᓄᐃᑦ ᕿᒫᑎᓪᓗᒋᑦ ᐋᓐᓂᑎᖅᑕᐅᑎᓪᓗᒋᑦ, ᐱᖃᓯᐅᑎᓗᒋᑦ ᑎᓴᒪᓂᑦ ᐃᓄᐃᑦ ᓄᓇᖓᓐᓂ ᐊᒻᒪᓗ ᐊᑕᐅᓯᕐᒥᒃ ᐋᑐᕚᒦᒃᑲᔭᖅᑐᒥᒃ.

ᖁᐊᖅᓵᓇᖅᑐᒻᒪᕆᐅᓪᓗᑎᑦ ᐃᓄᐃᑦ ᐊᕐᓇᐃᑦ ᖁᓄᔪᕐᓂᐊᖅᑕᐅᓲᖑᖕᒪᑕ ᐊᒻᒪᓗ ᐋᓐᓂᑎᖅᑕᐅᓲᖑᓪᓗᑎᑦ 14-ᒃᑲᓐᓂᒻᒪᕆᐊᓗᒃ ᐊᒥᓱᐊᖅᑎᖅ ᑲᓇᑕᑉ ᓴᓂᐊᓂ, ᒪᕐᕉᒃ ᐊᕐᕌᒎᒃ ᐅᖓᑖᓂᐅᓕᖅᑐᖅ ᐃᓄᐃᑦ ᐊᕐᓇᐃᑦ ᐊᒻᒪᓗ ᐃᓕᒌᑦ ᒐᕙᒪᑐᖃᒃᑯᓐᓂᑦ ᐊᑦᑕᓇᙱᑦᑐᓂᑦ ᐃᒡᓗᓕᐅᖁᔨᓯᒪᖃᑦᑕᓕᖅᐳᑦ.

ᐊᒃᓱᕈᕐᓇᓕᖅᑎᒃᑲᓐᓂᖅᑎᑕᐅᓪᓗᓂ, ᓄᕙᒡᔪᐊᕐᓇᖅ-19 ᐊᐃᑦᑑᑖᓘᖃᑦᑕᑎᓪᓗᒍ ᐊᒃᓱᕈᕐᓇᓕᖅᑎᑦᑎᓯᒪᕗᖅ ᐃᓄᐃᑦ ᐊᕐᓇᐃᑦ ᕿᑐᕐᖓᖏᓪᓗ ᐃᓅᓯᖏᖕᓂ ᐊᑦᑕᓇᖅᑐᒦᒌᖅᑎᓪᓗᒋᑦ. ᐊᑦᑕᓇᖅᑐᒦᑦᑎᓪᓗᒋᑦ ᐃᓅᓯᖏᑦ ᖃᐅᔨᒪᔭᐅᑦᑎᐊᖅᑐᑦ ᒐᕙᒪᒃᑯᓐᓄᑦ ᐊᒻᒪᓗ ᐃᓅᓯᖏᑦ ᐊᑦᑕᓇᖅᑐᒦᒌᖅᖢᑎᑦ ᓲᕐᓗᒃ ᐃᓄᒋᐊᓕᐊᖅᖢᑎᑦ ᐃᒡᓗᖏᑦ, ᓂᕿᖃᑦᑎᐊᙱᑦᑐᑦ, ᐊᑦᑕᓇᙱᑦᑐᓂᑦ ᕿᒫᕕᒃᓴᖃᙱᑦᑐᑦ ᕿᒫᕕᓂ ᐊᒻᒪᓗ ᐃᒡᓗᑖᕐᓂᐊᖅᑎᓪᓗᒋᑦ ᐅᑕᖅᑭᕕᐅᔪᓂᑦ, ᐋᙵᔮᕐᓇᖅᑐᒧᑦ ᐃᒥᐊᓗᒻᒧᓪᓗ ᐊᔪᕈᑎᖃᓗᐊᖅᑐᓃᖦᖢᑎᑦ. ᐊᒻᒪᓗ ᐋᓐᓂᑎᖅᑕᐅᓗᐊᓲᑦ ᐃᓄᐃᑦ ᐊᕐᓇᐃᑦ ᓂᕕᐊᖅᓵᓪᓗ. ᑕᒪᒃᑯᐊᓕᒫᑦ ᐊᑐᖅᑕᐅᕙᑦᑐᑦ ᐋᓐᓂᖅᑕᐅᖃᓯᐅᔾᔭᐅᕙᖦᖢᑎᑦ ᑭᖑᕚᕆᔭᐅᔪᑦ ᖃᓪᓗᓇᕐᔨᕐᖓᑦ ᐃᓕᖅᑯᓯᕐᒥᖕᓂᒃ ᐅᖃᐅᓯᕐᒥᖕᓂᓪᓗ ᐊᑐᖔᖅᑎᑦᑎᖃᑦᑕᕋᓱᐊᖅᑐᕕᓂᐅᓂᖏᖕᓄᑦ.

“ᖁᔭᓕᔪᒻᒪᕆᐅᕗᒍᑦ ᐱᐅᔪᒃᑯᑦ ᐃᓚᐅᖃᑕᐅᖃᑦᑕᓕᕐᓂᖏᑦ ᐊᒥᓱᑦ ᒐᕙᒪᑐᖃᒃᑯᓐᓂ ᒥᓂᔅᑕᐅᔪᑦ ᑕᒪᔅᓱᒪᑉ ᑐᒃᓯᕌᑦᑕ ᒥᒃᓵᓄᑦ,” ᐅᖃᖅᖢᓂ ᕇᐱᑲ ᑯᓪᓗ, ᐊᖓᔪᖅᑳᖅ ᐸᐅᒃᑑᑎᒃᑯᓐᓄᑦ. “ᑕᖅᑭᐅᕋᑖᖅᑐᕕᓂᕐᓂᑦ, ᖃᓄᖅᑑᖃᑎᖃᖅᖢᑕ ᐅᖃᖃᑎᖃᖃᑦᑕᖅᓯᒪᓕᖅᐳᒍᑦ ᒥᓂᔅᑕᐅᔪᓂᑦ ᕙᓐᑕᓪ, ᒪᑭᐊᓇ, ᒪᓐᓯᑉ, ᕼᐅᓯᐊᓐ ᐊᒻᒪᓗ ᒥᓗᕐ.”

ᑭᓯᐊᓂᓕ, ᐸᐅᒃᑑᑎᒃᑯᑦ ᐅᑉᐱᕈᓱᑉᐳᑦ ᓴᖅᑭᖅᑐᖃᕆᐊᖃᓕᕐᓂᖓᓂᒃ ᖃᐅᔨᔭᒃᓴᐅᑦᑎᐊᖅᑐᓂᒃ ᖃᓄᐃᓕᐅᕈᑎᖃᕆᐊᓯᓗᑎᑦ ᐊᕐᓇᐃᑦ ᐃᓄᐃᑦ  ᐃᓅᓯᖏᑦ ᐱᐅᓯᕚᓪᓕᖁᓪᓗᒋᑦ ᐊᒻᒪᓗ ᐊᑐᖃᑦᑕᕆᐊᖃᓕᖅᑕᖏᑦ ᐃᓄᐃᑦ ᓄᓇᖓᓐᓂᒥᐅᑕᐅᔪᑦ ᐊᒻᒪᓗ ᓄᓇᓕᐸᐅᔭᕐᓂᑦ. “ᐸᐅᒃᑑᑎᒃᑯᑦ ᕿᒫᕕᓂᑦ ᐊᑯᓂᒻᒪᕆᐊᓗᒃ ᑐᒃᓯᕋᖃᑦᑕᖅᓯᒪᓕᖅᑐᑦ ᐊᒻᒪᓗ ᕿᒫᕕᑖᕆᐊᖃᕐᓂᖏᑦ ᑐᐊᕕᕐᓇᖅᑑᖏᓐᓇᖅᖢᓂ −− ᔫᓂ 2019-ᒥ ᐊᓯᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ ᐅᓂᒃᑳᖓᑦ ᑕᒪᒃᑯᓂᖓ ᓴᖅᑮᔪᖃᖅᑎᑦᑎᓇᓱᐊᖁᔨᓯᒪᓪᓗᑎᑦ ᖃᓄᐃᓕᐅᕈᑕᐅᓗᑎᑦ,” ᐅᖃᖅᖢᓂ ᑯᓪᓗ.

“ᐅᒡᒍᕐᓇᖅᐳᖅ, ᑕᒪᒃᑯᐊ ᐱᕐᔪᐊᕌᓗᐃᑦ ᐊᑦᑕᓇᙱᑦᑐᑦ ᕿᒫᕕᖏᑦ ᐋᖅᑭᒃᑕᐅᓯᒪᙱᓚᑦ ᓱᓕ ᐅᓪᓗᒥᐅᔪᖅ, ᐊᓪᓛᓘᓐᓃᑦ ᑮᓇᐅᔭᖃᖅᑎᑦᑎᓂᐊᕐᓂᕋᖅᓯᒪᙱᓚᑦ ᓴᓇᔭᐅᓂᒃᓴᖏᖕᓂ ᒫᓐᓇᒫᖑᔪᖅ ᓯᕗᓂᑦᑎᓐᓂ,” ᓇᓗᓇᐃᔭᐃᓪᓗᓂ ᑯᓪᓗ. “ᑕᒪᓐᓇ ᐊᒃᓱᕐᔪᐊᕌᓗᒃ ᐃᓱᒫᓘᑎᒋᓕᕋᑦᑎᒍᑦ ᐊᒻᒪᓗ ᓈᒻᒪᙱᑦᓯᐊᒻᒪᕆᖦᖢᓂ, ᖃᐅᔨᒪᒐᑦᑕ ᐊᓯᔾᔨᖅᑐᖃᙱᒃᑯᓂ ᐃᓅᓯᕆᔭᐅᔪᑦ ᐊᓯᐅᔭᐅᑐᐃᓐᓇᖃᑦᑕᓂᐊᕐᒪᑕ.”

ᐃᓱᒪᒃᓴᖅᓯᐅᕈᑕᐅᓗᐊᕆᐊᓕᒃ ᐊᐃᕙᐅᑎᔾᔪᑎᖓ ᐸᐅᒃᑑᑎᒃᑯᑦ ᑮᓇᐅᔭᖅᑕᖃᖁᔨᓂᖏᑦ ᑕᒪᐃᓐᓂ ᐃᑲᔪᖅᑐᖅᑕᐅᔪᐃᓐᓇᐅᒍᓐᓇᕐᓂᖏᑦ ᐊᒻᒪᓗ ᑮᓇᐅᔭᓂᑦ ᐊᑐᖅᑕᐅᔪᖃᕐᓗᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᖕᓄᑦ ᑐᑭᖃᐃᓐᓇᙱᓚᖅ ᐃᑲᔪᖅᑐᖅᑕᐅᓂᐊᕐᒪᑕ ᐊᒻᒪᓗ ᑮᓇᐅᔭᓂᑦ ᐊᑐᖅᑐᖃᕐᓗᓂ ᐃᓄᖕᓄᑦ. ᑭᓯᐊᓂᓕ ᐃᒪᐃᑉᐳᖅ, ᐃᓄᐃᑦ ᓄᓇᓕᖏᑦ ᑮᓇᐅᔭᓂᑦ ᐱᓇᓱᐊᕈᓐᓇᐸᙱᓚᑦ ᕿᒫᕕᓄᑦ ᒐᕙᒪᑐᖃᒃᑯᑦ ᐃᓚᒌᑦ ᐋᓐᓂᑎᖅᑕᐅᑦᑕᐃᓕᒪᓂᖏᖕᓄᑦ ᐱᓕᕆᐊᖓᒍᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ, ᓄᑕᖅᑲᓄᑦ ᐊᒻᒪᓗ ᐃᓚᒌᓄᑦ.

ᐊᒻᒪᓗᒃᑲᓐᓂᖅ, ᒪᐃ 2020−ᐅᑎᓪᓗᒍ ᑮᓇᐅᔭᖃᖅᑎᑦᑎᓂᐊᕐᓂᕋᖅᑐᕕᓂᐅᓂᖓ ᑐᓴᖅᑎᑦᑎᓪᓗᓂ ᑲᓇᑕᑉ ᓯᕗᓕᖅᑎᕐᔪᐊᖓ ᑮᓇᐅᔭᖃᖅᑎᑦᑎᓂᐊᕐᓂᕋᖅᖢᓂ ᐅᖓᑖᓃᑦᑐᓂᑦ $85.6 ᒥᓕᐊᓐᓂᒃ ᑮᓇᐅᔭᓂᑦ ᓴᓇᔪᖃᕐᓗᓂ ᐊᒻᒪᓗ ᐊᐅᓚᑕᐅᔪᖃᕐᓗᓂ 12-ᓂᑦ ᓄᑖᕐᓂᑦ ᕿᒫᕕᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᐱᑎᑦᑎᓪᓚᑦᑖᕐᓂᐊᕐᓂᖓᓄᑦ ᖃᓄᐃᓕᐅᕈᑎᖃᕐᓗᓂ ᐅᖃᖅᓯᒪᙱᓚᑦ ᑖᒃᑯᓄᖓ ᑮᓇᐅᔭᓂᑦ ᐊᑐᖅᑐᖃᕈᓐᓇᖅᓯᓗᓂ ᕿᒫᕕᓄᑦ ᐱᓗᐊᖅᑐᒥᒃ ᐃᓄᐃᑦ ᐊᕐᓇᓄᑦ. ᑭᓯᐊᓂᓕ ᐃᒪᐃᑉᐳᖅ, ᒪᕐᕈᑐᐊᒃ ᕿᒫᕕᐅᔭᕇᖅᑑᓐᓂᒃ ᐊᑐᖅᑕᐅᔭᕆᐊᓖᒃ ᐊᖏᔪᐊᓗᒻᒥᒃ ᐊᕕᑦᑐᖅᓯᒪᔪᒥᒃ ᑲᓇᑕᑉ ᐅᑭᐅᖅᑕᖅᑐᖓᑕ ᐊᕕᑦᑐᖅᓯᒪᔪᖏᑦ ᐱᖓᓱᓄᑦ ᐊᑐᖅᑕᐅᔭᕆᐊᖃᖅᖢᑎᑦ, ᑮᓇᐅᔭᑦ ᐊᑐᖅᑕᐅᖔᕋᔭᖅᑐᑦ ᐃᓄᐃᑦ ᓄᓇᓕᖏᑕ ᓯᓚᑖᓃᑦᑐᓄᑦ.

“ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐊᑕᐅᓯᑐᐃᓐᓇᑯᓗᖕᒨᖅᑕᐅᔭᕆᐊᖃᙱᓚᑦ,” ᐅᖃᖅᖢᓂ ᑯᓪᓗ. “ᐃᑲᔪᖅᑐᐃᖏᓐᓇᕋᓗᐊᖅᖢᑕ ᐊᑐᐊᒐᕐᓂᑦ ᐊᒻᒪᓗ ᑮᓇᐅᔭᖃᖅᑎᑕᐅᓲᖑᓂᖏᖕᓂᑦ ᐱᐅᓯᑎᑦᑎᒋᐊᓲᑦ ᓄᓇᖃᖅᑳᖅᓯᒪᔫᖃᑎᑦᑎᑦᑕ ᖃᓄᐃᑦᑕᐃᓕᓂᖏᖕᓄᑦ, ᐅᕙᒍᑦ ᐃᓄᐃᑦ ᕿᒪᒃᑕᐅᑐᐃᓐᓇᕆᐊᖃᕈᓐᓃᕋᑦᑕ, ᑕᐃᒪᐃᑕᐅᖏᓐᓇᖅᑐᐊᓘᖃᑦᑕᖅᖢᑕ. ᐊᒥᓱᒻᒪᕆᐅᓪᓗᑎᑦ ᐱᔾᔪᑏᑦ − ᐱᖃᓯᐅᑎᓪᓗᒍ ᒐᕙᒪᑐᖃᒃᑯᓐᓄᑦ ᑲᒪᒋᔭᐅᖃᑦᑕᖅᓯᒪᓂᑯᕗᑦ, ᓱᑯᑦᑎᐊᓃᓐᓂᕗᑦ ᓄᓇᓕᑦᑕ, ᐊᒻᒪᓗ ᐊᔾᔨᐅᙱᑦᑑᓪᓗᓂ ᐃᓕᖅᑯᓯᕗᑦ − ᑭᙴᒪᒋᔭᕗᑦ ᐊᔾᔨᐅᖃᑦᑕᓲᖑᙱᓚᑦ.”

ᓯᕗᓂᐊᒍᑦ ᑮᓇᐅᔭᖅᑐᕈᑎᒃᓴᓂᑦ ᑐᒃᓯᕋᐅᑎᓕᐅᓚᐅᙱᑦᑎᓪᓗᒋᑦ ᒫᓐᓇᕈᓗᒃ ᑲᑎᒪᔨᕋᓛᓄᑦ ᑮᓇᐅᔭᓕᕆᓂᕐᒧᑦ (ᒫᓐᓇ ᓄᖅᑲᖓᑲᐃᓐᓇᖅᑐᖅ ᒪᓕᒐᓕᐅᕐᕕᕐᔪᐊᖅ ᓄᖅᑲᖓᑲᐃᓐᓇᖅᓯᒪᓂᖓᓄᑦ), ᐸᐅᒃᑑᑎᒃᑯᑦ ᐅᖃᒃᑲᓐᓂᖅᓯᒪᓚᐅᕐᒥᔪᑦ ᕿᒫᕕᐅᔪᓄᑦ ᑮᓇᐅᔭᖅᑕᖃᖁᔨᓪᓗᑎᑦ ᑐᐊᕕᕐᓇᖅᑐᒃᑯᑦ ᓯᕗᓪᓕᐅᔾᔭᐅᓗᓂ, ᐊᒻᒪᓗᑦᑕᐅᖅ ᒪᕐᕉᖕᓂᒃ ᖃᐃᓕᐅᖁᔨᓪᓗᑎᑦ:

  • ᒐᕙᒪᑐᖃᒃᑯᑦ ᑮᓇᐅᔭᖅᑎᒍᑦ ᐃᑲᔪᖅᑐᐃᓗᑎᑦ ᐋᖅᑭᓱᖅᑕᐅᓗᓂ ᐊᒻᒪᓗ ᐊᐅᓚᑕᐅᓂᒃᓴᖓᓂᑦ ᐱᓕᕆᐊᑉ ᐱᐅᓯᕚᓪᓕᖅᑎᑦᑎᓇᓱᐊᖅᑐᑦ ᖃᓄᐃᑦᑕᐃᓕᒪᓂᖏᖕᓂᑦ ᐊᒻᒪᓗ ᐅᓗᕆᐊᓇᖅᑐᒨᖅᑎᑎᑦᑕᐃᓕᔪᑦ ᐃᓄᐃᑦ ᐊᕐᓇᓂᑦ ᐊᒻᒪᓗ ᓄᑕᖅᑲᓂᑦ ᓄᓇᓕᐸᐅᔭᕐᓃᑦᑐᓂᑦ ᑲᓇᑕᓗᒃᑖᒥ, ᐊᒥᓲᓂᖅᓴᕈᖅᑎᑕᐅᓗᑎᑦ ᐃᒡᓗᒃᓴᑦ ᐊᑭᑐᓗᐊᙱᑦᑐᑦ ᐊᒻᒪᓗ ᐊᔪᕈᓐᓃᖅᓴᕈᑎᒃᓴᑦ ᐱᓕᒻᒪᒃᓴᕈᑎᑕᖃᕐᓂᖅᓴᐅᓕᕐᓗᑎᑦ.

ᐊᒥᓱᑦ ᑲᑐᔾᔨᖃᑎᒌᖑᔪᑦ ᐃᓕᓴᕆᔭᐅᓯᒪᓲᑦ ᐃᓄᐃᑦ ᐃᓚᒌᑦ ᑭᙴᒪᒋᔭᖏᖕᓂᑦ ᖃᐅᔨᒪᔨᒻᒪᕆᐅᓲᖑᓪᓗᑎᑦ ᐅᕝᕙᓘᓐᓃᑦ ᐃᖅᑲᓇᐃᔮᖃᓲᑦ ᐋᓐᓂᖅᑎᕆᑎᑕᐅᑦᑕᐃᓕᓪᓗᑎᑦ ᐊᕐᓇᐃᑦ ᐅᖃᖅᓯᒪᒻᒥᔪᑦ ᓴᙱᔪᒃᑯᑦ ᐃᑲᔪᖅᑐᐃᓂᖏᖕᓂᑦ ᑐᐊᕕᕐᓇᖅᑐᒃᑯᑦ ᓄᑖᕐᓂᑦ ᑮᓇᐅᔭᓂᑦ ᐊᑐᖅᑐᖃᕆᐊᖃᓕᕐᓂᖓᓄᑦ ᕿᒫᕕᓕᐅᖅᑐᖃᕐᓗᓂ ᐊᒻᒪᓗ ᐅᑕᖅᑭᕕᓐᓂ ᐃᒡᓗᑖᕋᓱᐊᖅᑐᓂᑦ. ᑕᒪᒃᑯᐊ ᑲᑐᔾᔨᖃᑎᒌᖑᔪᑦ ᐱᖃᓯᐅᔾᔨᕗᑦ ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᑦ ᑐᙵᕕᒃ ᑎᒥᖓᑦ (ᓄᓇᑖᕐᓂᕐᒧᑦ ᐃᓕᒌᑦ) ᐊᒻᒪᓗ ᐊᕐᓇᐃᑦ ᕿᒫᕕᖏᑦ ᑲᓇᑕᒥ.

                                                                                         -30-

ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑲᓇᑕᒥ ᖃᑭᒍᑎᒃᓴᓕᐅᙱᑦᑑᓪᓗᓂ ᑲᑐᔾᔨᖃᑎᒌᖑᕗᖅ ᑭᒡᒐᖅᑐᐃᔪᖅ ᑕᒪᐃᓐᓂ ᐃᓄᖕᓂᑦ ᐊᕐᓇᓂᑦ ᑲᓇᑕᒥ. ᐱᓇᓱᐊᒐᖓᑦ ᐅᔾᔨᕈᓱᓕᖅᑎᑦᑎᒋᐊᕐᔫᒥᓪᓗᑎᑦ ᐃᓄᐃᑦ ᐊᕐᓇᐃᑦ ᑭᙴᒪᒋᔭᖏᖕᓂᑦ, ᐊᒻᒪᓗ ᐃᓚᐅᖃᑕᐅᖁᔨᓪᓗᑎᑦ ᓄᓇᓕᓐᓂ, ᐊᕕᑦᑐᖅᓯᒪᔪᓂ ᐊᒻᒪᓗ ᑲᓇᑕᒥ ᐃᓲᓘᑎᒋᔭᐅᓲᓂᑦ ᐃᓅᓯᖏᖕᓄᑦ, ᐃᓕᖅᑯᓯᖏᖕᓄᑦ ᐊᒻᒪᓗ ᐱᕙᓪᓕᐊᔪᓕᕆᓂᖏᖕᓄᑦ.

ᑐᑭᓯᒋᐊᒃᑲᓐᓂᖁᓪᓗᑎᑦ, ᖃᐅᔨᒃᑲᕐᓗᒍ:

ᓲᓴᓐ ᑭᖕ
613.724.1518
007susanking@gmail.com

Share This